სტამბოლში რუსეთისა და აშშ-ის დელეგაციებს შორის მოლაპარაკებები მიმდინარეობს — ამის შესახებ რუსული მედია რია ნოვოსტი წერს.

მათი ცნობით, მოლაპარაკებები სტამბოლში რუსეთის გენერალურ საკონსულოში მიმდინარეობს. შეხვედრაზე მოსკოვს აშშ-ში რუსეთის ელჩი, ალექსანდრე დარჩიევი, ხოლო ვაშინგტონს რუსეთისა და ცენტრალური ევროპის საკითხებში აშშ-ის სახელმწიფო მდივნის თანაშემწის მოადგილე, სონატა კოლტერი წარმოადგენს.

მხარეები ქვეყნებს შორის დიპლომატიური მისიების ნორმალიზების საკითხებს განიხილავენ.

Reuters-ის ინფორმაციით, აშშ-ის სახელმწიფო დეპარტამენტის პრესსპიკერმა, ტემი ბრიუსმა სტამბოლში მხარეების შეხვედრაზე განაცხადა, რომ "უკრაინა დღის წესრიგში არ არის".

"ეს მოლაპარაკებები მხოლოდ ჩვენი საელჩოს ოპერაციებზეა ორიენტირებული და არა ორმხრივი ურთიერთობების ნორმალიზებაზე, რაც შეიძლება მოხდეს, როგორც აღვნიშნეთ, მას შემდეგ, რაც რუსეთსა და უკრაინას შორის მშვიდობა დამყარდება", — განაცხადა ბრიუსმა.

შეგახსენებთ, აშშ-სა და რუსეთს შორის საელჩოების ნორმალური ფუნქციონირების საკითხების შესახებ პირველი შეხვედრა სტამბოლში 27 თებერვალს გაიმართა.