"ის, რაც მოხდა, ის უბედურება, რაც დაგვატყდა, უცხოური ძალა იყო, საბჭოთა არმია აბა ვინ იყო? ჩვენი შინაურები იყვნენ?" — ასე უპასუხა კახა კალაძემ ჟურნალისტის კითხვას, ირაკლი კობახიძის 9 აპრილთან დაკავშირებით გაკეთებულ განცხადებაზე.

"რაც შეეხება პრემიერ-მინისტრის განცხადებას, "უცხოური ძალა" ნიშნავს იმას, რასაც დღეს წარმოადგენს უცხოური ძალა დღევანდელი რადიკალების სახით, რომლებიც არიან გამარგინალებულები. ის რაც მოხდა, ის უბედურება, რაც დაგვატყდა, უცხოური ძალა იყო, საბჭოთა არმია აბა ვინ იყო? ჩვენი შინაურები იყვნენ? მარტივად გასაგებია, საბჭოთა არმია როგორ იქნებოდა ჩვენი, საკუთარი? საბჭოთა არმია იყო საბჭოთა არმია, რაც მოხდა, იყო ძალიან მძიმე. მივიღეთ სრული კატასტროფა, უამრავი ადამიანი დაიღუპა, თუმცა მეორე მხრივ, ეს იყო ბრძოლა თავისუფლებისთვის, დამოუკიდებლობისთვის და უდიდესი სტიმული იყო ბევრი ადამიანისთვის მაშინ გადადგმული ეს ნაბიჯი.

უცხოურ ძალას ყოველთვის ჰქონდა ჩვენ ქვეყანასთან მიმართებით თავისი ინტერესები. არ იფიქროთ, რომ აქ ამერიკელი ან ევროპელი ჩამოვა და ქართველის გასაკეთებელს ის გააკეთებს. ბევრი რაღაცები იფუთებოდა, რომ ვითომ რა კეთილ საქმეებს აკეთებს და რა "კეთილი ბიძიები" არიან, მაგრამ ამის უკან, ბოლო წლებში კარგად გამოაშკარავდა ყველაფერი — სახელმწიფო გადატრიალებების მცდელობა, საზოგადოების გახლეჩა, დაპირისპირება, ექსტრემისტული ორგანიზაციების დაფინანსება, საიდან მოდიოდა ეს თანხები? ხომ ვერ შემახსენებთ ვინ იყვნენ ეს ორგანიზაციები და ვინ იყო ამის უკან? ხომ ვერ მეტყვით? ამერიკის შეერთებულ შტატებს აქვს 6 მლრდ დახმარება საქართველოსთვის, ბიძინა ივანიშვილს ქველმოქმედებაში აქვს დახარჯული 6 მლრდ დოლარი. აშშ არის ზესახელმწიფო, უძლიერესი სახელმწიფო. იმით კი არ უნდა დავკმაყოფილდეთ, 6 მლრდ დოლარი 30 წლის განმავლობაში რომ დახარჯეს, უფრო მეტი უნდა მოვთხოვოთ პარტნიორობისთვის, მეგობრობისთვის. ამ აგენტურით, რომელიც იქმნებოდა წლების განმავლობაში ორ კაპიკს გადმოაგდებდნენ და ამით თურმე უნდა ვყოფილიყავით კმაყოფილები", — განაცხადა კალაძემ.

შეგახსენებთ, რომ გუშინ, 9 აპრილს, 9 აპრილთან დაკავშირებულ განცხადებაში ოცნების ხელისუფლების პრემიერმინისტრმა, ირაკლი კობახიძემ განცხადება გაავრცელა, სადაც ეწერა, რომ "9 აპრილს უცხოურმა ძალამ განახორციელა ძალადობა ჩვენი თანამოქალაქეების წინააღმდეგ", მან ამ ტექსტში 6-ჯერ ახსენა "უცხოური ძალა" და არც ერთხელ რუსეთი.