5 და 6 ივლისს თბილისში განვითარებულ მოვლენებს გამოეხმაურა გარემოს დამცველი არასამთავრობო ორგანიზაცია Nature Conservation Georgia. საკუთარ ფეისბუქგვერდზე გამოქვეყნებულ განცხადებაში, რომელსაც თან ერთვის ორგანიზაციის ლგბტქ ფერებში გადაწყვეტილი ლოგო, აღნიშნულია, რომ ისინი საქართველოში მცხოვრებ "ყოველ ჩაგრულ ადამიანს" სოლიდარობას და მხარდაჭერას უცხადებენ. ამასთან, გმობენ "ძალადობრივ პროცესებს" და ემიჯნებიან "ამ პროცესში ჩართულ ყველა ადამიანს".

"სრულიად ვემიჯნებით კანონის ფარგლებს გარეთ არსებულ ნებისმიერ ქმედებას, რომელიც სხვა ადამიანის უფლებების შელახვაზე გადის".

განცხადებაში ასევე გამოთქმულია "რიონის ხეობის მცველების" გადაწყვეტილებით გაკვირვება.

"ვგმობთ მათ ქმედებას და იმედს ვიტოვებთ, რომ ეს მოძრაობა და მათი ლიდერები შეძლებენ დაშვებული შეცდომების რაიმე გზით გამოსწორებას და გააგრძელებენ ჯანსაღი აზრის მხარეს დგომას, გააკეთებენ ამას ისე, როგორც აკეთებდნენ ასეულობით დღე. რადგან ეს ბრძოლა დღეს უმნიშვნელოვანეს გარემოსდაცვით ხასიათს ატარებს და მისი მიზანი სრულად გამართლებულია".

დასასრულს Nature Conservation Georgia დასძენს, რომ როგორც სამთავრობო და არასამთავრობო ორგანიზაციების, ასევე ავტორიტეტების ვალდებულებაა, განვითარებულ მოვლენებზე საკუთარი პოზიცია გამოხატონ და დაგმონ ძალადობა.

"ჩვენი სრული მხარდაჭერა მშვიდობას, ადამიანთა თავისუფლებას, ჯანსაღ საზოგადოებასა და სიყვარულს".

5-6 ივლისის მოვლენები

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა, საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანეს და მოძალადე ჯგუფები რუსთაველზე შეუშვეს. მათ მეორედ ჩამოგლიჯეს და დაწვეს ევროკავშირის დროშა.

მსოფლიო გამოხმაურება

განვითარებული მოვლენების პასუხად, არაერთმა ორგანიზაციამ ხელისუფლების არასათანადო ქმედებებზე გაამახვილა ყურადღება. "შოკირებული ვართ, რომ ხელისუფლებამ ძალადობის აღკვეთა ვერ შეძლო", — ასე შეაფასა Human Rights House Foundation-მა 5 ივლისს მომხდარი. ISFED-ის განცხადებით კი, "სახელმწიფო მოქალაქეთა კონსტიტუციური უფლებების დაცვას ვერ უზრუნველყოფს".

სახელმწიფო ლიდერებსა და უწყებებს დაუყოვნებლივი მოქმედებისა და ადამიანების დაცვისკენ მოუწოდეს 21 საელჩოდანაც.

საქართველოში მომხდარმა მოვლენებმა მოიცვა მსოფლიო მედიაც — BBC-მ, The Guardian-მა და Reuters-მა 5 ივლისის დღის ქრონიკა სრულად გააშუქეს. ხოლო მას შემდეგ, რაც ქართველმა ჟურნალისტმა საკითხი კანის კინოფესტივალის პრესკონფერენციაზეც გააჟღერა, საქართველო და მომხდარი კიდევ ერთხელ აღმოჩნდა არაერთი ცნობილი ადამიანის ყურადღების ცენტრსა და წამყვანი უცხოურენოვანი გამოცემების ობიექტივში.