მას შემდეგ, რაც Tesla-მ მოგების მკვეთრი ვარდნა განიცადა, ილონ მასკი, რომელიც დონალდ ტრამპმა DOGE-ს (მთავრობის ეფექტურობის დეპარტამენტის) ხელმძღვანელად დანიშნა, აცხადებს, რომ ვაშინგტონში სახელმწიფო ხარჯების შემცირებაზე ზრუნვაზე ნაკლებ დროს გაატარებს და მეტ ყურადღებას დაუთმობს Tesla-ს მართვას.

22 აპრილს ანალიტიკოსებთან სატელეფონო კონფერენციაზე საუბრისას მასკმა თქვა, რომ "ახლა, როცა DOGE-ს ჩამოყალიბების მთავარი სამუშაოები დასრულებულია," ის "მაისიდან ბევრად მეტ დროს დაუთმობს Tesla-ს." მასკის თქმით, ახლა სამთავრობო საქმეებს კვირაში მხოლოდ ერთ ან ორ დღეს დაუთმობს.

Tesla-ს ავტომობილების გაყიდვის საგრძნობი კლება მას შემდეგ დაიწყო, რაც ილონ მასკის პოლიტიკის წინააღმდეგობის ნიშნად ამერიკის მოქალაქეებმა კომპანიას ბოიკოტი გამოუცხადეს. DOGE ძირითადად სამუშაო ადგილების შემცირებაზეა ორიენტირებული, რამაც როგორც Tesla-ს არსებულ მფლობელებს, ასევე პოტენციურ მყიდველებსაც უბიძგა ილონ მასკისთვის თავიანთი უკმაყოფილების ჩვენებისკენ. ტეხასის ქალაქ ოსტინში დაფუძნებულმა კომპანიამ პირველი კვარტლისთვის 71%-იანი მოგების ვარდნა და 9%-იანი შემოსავლის შემცირება იზარალა, რაც მასკისთვის საგანგაშო ციფრებია.

"ინვესტორები მასკისგან Tesla-ში დაბრუნებას ელიან,"– თქვა დენ აივზმა, Wedbush Securities-ის უფროსმა ანალიტიკოსმა, — "ეს სწორი მიმართულებით გადადგმული დიდი ნაბიჯია."

ამჟამად, Tesla-ს აქციების ფასი წლის დასაწყისთან შედარებით 40%-ითაა შემცირებული.

DOGE-ის მომავალი შესაძლოა მასკის გარეშე გაგრძელდეს. არსებობს ვარაუდები, რომ მისი ადგილი შესაძლოა დაიკავოს გამოცდილმა ბიუროკრატმა, რაც DOGE-ის საქმიანობას უფრო სტრუქტურულ და სტაბილურ სახეს მისცემს.