ცნობილი ამერიკელი პოეტის, სილვია პლათის, წერილებსა და პირად ნივთებს, მათ შორის ქორწინების ბეჭედს, ფოტოალბომსა და ტედ ჰიუზის ჩანახატებს, აუქციონზე გასაყიდად გამოიტანენ.

Sotheby’s-ის აუქციონზე პოეტის კუთვნილ 55 ნივთს გამოიტანენ. ამ ნივთებთან ერთად, განსაკუთრებულ ინტერესს იწვევს პლათის წერილები მის ქმართან, ასევე ცნობილ პოეტ ტედ ჰიუზთან, რომელთანაც სილვიას დიდი ხნის განმავლობაში აკავშირებდა რომანტიკული ურთიერთობა.

აუქციონის წარმომადგენელი, გებრიელ ჰიტონი ამბობს, რომ გასაყიდად გამოტანილი ნივთები პლათის შემოქმედებით განვითარებაზე, ტედისადმი მის სიყვარულსა და პოეტის განსაკუთრებულ იუმორის გრძნობაზე ჰყვება.

ჰიუზისათვის გაგზავნილი 32 წერილი 1956 წლიდან 1961 წლამდე პერიოდით თარიღდება.

ტედ ჰიუზი და სილვია პლათი 1959 წელს.

ფოტო: sylvia_plath_photos / Instagram

"აქ არის ურთიერთობის დასაწყისი, სადაც სილვია ძალიან, ძალიან შეყვარებულია. იგი აღფრთოვანებულია მათი კავშირით და მომავლით. თუმცა, წერილებით ასევე შეიტყობთ, რომ ეს კავშირი შემოქმედებითიც იყო — როგორ მუშაობდნენ და ფიქრობდნენ ისინი ერთად", — ამბობს ჰიტონი.

აღსანიშნავია, რომ პლათის პირადი წერილები რამდენიმე წლის წინ ორ ტომადაც გამოიცა.

ნივთებს შორისაა სილვიას ოჯახური ფოტოალბომი, სადაც მისი და ჰიუზის ამერიკაში მოგზაურობის და მეგობრებთან, მათ შორის თომას ელიოტთან შეხვედრის ფოტოებია ჩაკრული, ქვეშ პოეტის გაკეთებული მინაწერებით. ამ მოგზაურობას, რომელიც წყვილის თაფლობისთვით იწყება, ჰიუზი, მოგვიანებით, ხშირად ახსენებდა პირად წერილებში.

გარდა ამისა, აუქციონზე გაიყიდება ჰიუზის ჩანახატები და პლათის კუთვნილი ტაროს კარტის შეკვრა, რომელიც მას ტედმა აჩუქა.

სილვიას დახატული ტედი.

ფოტო: Sotheby's

აუქციონი 9 ივლისს გაიხსნება.

სილვია და ტედი ლიტერატურის ისტორიაში ერთ-ერთი ყველაზე ცნობილი წყვილი იყო. ორი სახელგანთქმული ამერიკელი პოეტი ერთად რამდენიმე წლის განმავლობაში ცხოვრობდა. მათ ორი შვილიც ჰყავდათ, თუმცა, მას შემდეგ, რაც ტედმა ურთიერთობა სხვა ქალთან დაიწყო, პლათი მას გაშორდა და ბავშვებზე ზრუნვა მარტომ განაგრძო. ამ პერიოდიდან პოეტის მენტალური მდგომარეობა გაუარესდა, რაც, საბოლოოდ, 1963 წელს თვითმკვლელობით დასრულდა.

პლათის წიგნები, მათ შორის სიკვდილის შემდეგ გამოცემული პოეტური კრებული არიელი (1965) და ერთადერთი, ნახევრად ავტობიოგრაფიული რომანი, ზარხუფი (1963) სიღრმისეულად აღწერს მის შინაგან სამყაროს, მენტალურ პრობლემებსა და დამოკიდებულებებს სხვადასხვა საკითხის, მათ შორის, ქალის სოციალური როლისადმი. ამის გამო, სილვიას ფემინისტურ ლიტერატურაში განსაკუთრებული ადგილი უკავია.