თბილისი პრაიდის ერთ-ერთი აქტივისტი, გიორგი თაბაგარი ნათია მეზვრიშვილს პასუხობს და ამბობს, რომ 2019 წლის ღირსების მარშზე შინაგან საქმეთა სამინისტროს პასუხი იყო — "ვერ დაგიცავთ, რაც გინდათ ის ქენით".

"2019 წელს ხდებოდა ხილული დანაშაული. დღისით, მზისით. კონკრეტულად ლევან ვასაძემ იმ ზაფხულს 14 სხვადასხვა მუხლი დაარღვია! შექმნა ბანდ-ფორმირებები, დასდევდნენ ადამიანებს და გვემუქრებოდნენ.. გვაშინებდა სახელმწიფოც. ჩემი სამოქალაქო აქტივიზმის მეხსიერებაში, რომელიც აგერ უკვე 10 წელზე მეტს ითვლის, 2019 წელი იყო ძალიან დიდი ჩავარდნა სახელმწიფოსთვის. იმჟამინდელმა ხელისუფლებამ ვერ დაუპირისპირა ვერაფერი მოძალადე ჯგუფებს და ისევ ჩვენი გადამალვით ცდილობდა ფონს გასვლას. "ვერ დაგიცავთ, რაც გინდათ ის ქენით" იყო შსს-ს პასუხი 2019 წლის ღირსების მარშზე და პირდაპირი გაგებით შეგვატოვა მოძალადე ჯგუფებს. დაგვტოვა ჩვენ ინდივიდუალურ პასუხისმგებლობებთან - გავიდოდით თუ არა და გავრისკავდით თუ არა სიცოცხლეს", — წერს თაბაგარი ფეისბუქგვერდზე.

მისივე თქმით, არ სურს, რომ პოლიტიკური პასუხისმგებლობები მხოლოდ შსს-ზე გადატყდეს, გადაწყვეტილების მიმღებ პირებს უნდა ჰქონდეთ, პირველ რიგში, პოლიტიკური ნება და მისი წარმოდგენით, 2019 წელს ხელისუფლებას ეს ნება არ ჰქონდა.

მთავრობის ადმინისტრაციის ყოფილი უფროსმა და პარტია საქართველოსთვის წევრმა, ნათია მეზვრიშვილმა ფორმულას ეთერში განაცხადა, რომ გიორგი თაბაგარი ცრუობს და 2019 წელს პოლიციამ ძალადობა არ დაუშვა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა. ამ დროს ნათია მეზვრიშვილი შინაგან საქმეთა მინისტრის მოადგილე იყო. როგორც თბილისი პრაიდის ორგანიზატორი, გიორგი თაბაგარი აცხადებს 2019 წელს სიტუაცია ბევრად მძიმე იყო, ვინაიდან სახელმწიფოსთან ნაკლები თანამშრომლობა იყო, უშუალოდ მარშის დღის კი შინაგან საქმეთა სამინისტროსგან მიიღეს შეტყობინება, რომ მათ არ დაიცავდნენ.