პარლამენტის თავმჯდომარემ შალვა პაპუაშვილმა "ნამახვანჰესის" პროექტზე საუბრისას განაცხადა, რომ პროექტის წინააღმდეგ კამპანიას, "ბრიუსელიდან დაფინანსებული" სამი არასამთავრობო ორგანიზაცია — "მწვანე ალტერნატივა", "სოციალური სამართლიანობის ცენტრი" და "საია" — ხელმძღვანელობდა. პაპუაშვილი ამ ორგანიზაციებს პროექტის ჩაშლაში ადანაშაულებს და ნამახვანჰესის საქმეს გამჭვირვალობის კანონის საჭიროების მაგალითად იყენებს.

"ამ დღეებში კიდევ ერთხელ შეგვახსენეს ნამახვანჰესის თემა, სადაც ჯერ კიდევ მიმდინარეობს სასამართლო პროცესები და არის რისკი, რომ საქართველოს ბიუჯეტს 400 მლნ დოლარის გადახდა დაეკისროს იმ კომპანიის სასარგებლოდ, რომელიც ფაქტობრივად აქედან გააგდო უცხოეთიდან დაფინანსებულმა აგენტურამ. გარდა იმისა, რომ საქართველომ მიიღო ზიანი და ეს მნიშვნელოვანი ენერგეტიკული პროექტი ვერ განხორციელდა, დამატებით საქართველოს ბიუჯეტიდან შეიძლება მოგვიწიოს იმ ზიანის ანაზღაურება, რომელიც მათ — უცხოური დაფინანსების მქონე ორგანიზაციებმა — მიაყენეს ქვეყანას.

ამ კამპანიას მაშინ სრულად კურირებდა სამი არასამთავრობო ორგანიზაცია — "მწვანე ალტერნატივა", "სოციალური სამართლიანობის ცენტრი" და "საია". სამივე დაფინანსებული იყო ბრიუსელიდან და რამდენიმე სხვა წყაროდან. დღეს უკვე ყველამ იცის, თუ რამხელა აბსოლუტური ფარსი, სრული დეზინფორმაცია და ჰიბრიდული თავდასხმა იყო ის, რაც მაშინ მოაწყვეს, რათა ერთ-ერთი უმნიშვნელოვანესი ენერგეტიკული პროექტი ჩაშლილიყო.

ასე რომ, ნამახვანჰესის ისტორია არის ყველაზე კარგი დასტური იმისა, რომ გამჭვირვალობის კანონი არის ყველაზე ქართული კანონი, რაც კი შეიძლება მიეღო პარლამენტს ბოლო წლების განმავლობაში, ვინაიდან იგი ემსახურება ქართულ ინტერესებს. ისეთი მავნებლობა, რაც ბრიუსელიდან დაფინანსებულმა ხალხმა ჩაიდინა, როდესაც ჩაშალეს ყველაზე მნიშვნელოვანი ენერგეტიკული პროექტი, მომავალში ვეღარ მოხდება", — განაცხადა შალვა პაპუაშვილმა.

შეგახსენებთ, რომ აშშ-ის კოლუმბიის ოლქის სასამართლომ საქართველოს თურქული კომპანია ENKA-ს წინააღმდეგ არბიტრაჟში დაკისრებული $400 მილიონ დოლარზე მეტი კომპენსაციის გადახდა დააკისრა — ამის შესახებ აღნიშნულია 2026 წლის 11 სექტემბრით დათარიღებულ გადაწყვეტილებაში.

იუსტიციის მინისტრის პირველი მოადგილე ბექა ძამაშვილი აცხადებს, რომ "ეს არ არის საბოლოო გადაწყვეტილება და ვაშინგტონის იურისდიქციაშიც ექვემდებარება შემდეგ გასაჩივრებას. რა თქმა უნდა, საქართველოს მთავრობა გამოიყენებს ამ იურიდიულ შესაძლებლობას და ჩვენ ყველა იურისდიქციაში ბოლომდე დავიცავთ სახელმწიფო ინტერესებს".

"დღეს ცალკეული ტელევიზიების მიერ გავრცელდა არასწორი ინფორმაცია, თითქოს, აშშ-ის სასამართლომ საქართველოს მთავრობას "ნამახვანჰესთან" დაკავშირებით საქმეზე კომპანია ENCA-ს სასარგებლოდ, 400 მლნ აშშ დოლარის გადახდის ვალდებულება დააკისრა. სინამდვილეში, ვაშინგტონის სასამართლოში არანაირი პროცესი არ მიმდინარეობს, რომელიც არსებითად მსჯელობს ამ საკითხზე. საქმე შეეხება საზოგადოებისთვის კარგად ცნობილ საარბიტრაჟო გადაწყვეტილებას, რომელიც 2024 წელს მიიღო პარიზის არბიტრაჟმა და შესაბამისად, საქართველოს ხელისუფლებას ეს გადაწყვეტილება გასაჩივრებული აქვს პარიზის სააპელაციო სასამართლოში. სწორედ პარიზში მიმდინარეობს საქმესთან დაკავშირებით მთავარი პროცედურები, რომელმაც საბოლოოდ უნდა გადაწყვიტოს ეს გადაწყვეტილება ძალაში დარჩება თუ არა. საქართველოს ხელისუფლებას მოთხოვნილი აქვს ამ გადაწყვეტილების გაუქმება და ჩვენ მიმდინარე წლის ბოლომდე არ ველოდებით რაიმე გადაწყვეტილებას ამ საქმეზე", — განაცხადა ძამაშვილმა.