მას შემდეგ, რაც UEFA-მ მიუნხენის ალიანც არენის ლგბტქ დროშის ფერებში განათებაზე უარი განაცხადა, ცნობილმა საფეხბურთო გუნდებმა თანასწორობის მხარდასაჭერი განცხადებები გაავრცელეს.

"ფეხბურთი ყველას უყვარს", — წერს იტალიური საფეხბურთო კლუბი იუვენტუსი ტვიტერზე.

"სიყვარული სიყვარულია, იმის მიუხედავად, ვინ გიყვარს", — ასე გამოეხმაურა მოვლენებს კიდევ ერთი იტალიური გუნდი, მილანი.

"სიამაყით და პატივისცემით", — განაცხადა ბარსელონამ და ტვიტერზე ექვსფერიან დროშაზე გამოსახული საკუთარი ლოგო გამოაქვეყნა.

ლგბტქ დროშის ფერებში გადაწყვეტილი ლოგოთი გამოხატა მხარდაჭერა გერმანულმა კლუბმა ბაიერ 04 ლევერკუზენმა.

მიუნხენის მერიამ ევროპული ფეხბურთის ასოციაციების კავშირს გერმანია-უნგრეთის თამაშზე სტადიონის განათების თხოვნით რამდენიმე დღის წინ, მას შემდეგ მიმართა, რაც უნგრეთის პარლამენტმა ჰომოფობიური და დისკრიმინაციული გადაწყვეტილება მიიღო. გადაწყვეტილების მიხედვით, "გეი-თემატიკა", მათ შორის ქვიარ ადამიანების გამოჩენა, სასკოლო განათლებასა და მოზარდებისთვის განკუთვნილ სატელევიზიო შოუებში იკრძალება.

UEFA-ს განცხადებით, მოთხოვნა "პოლიტიკური დატვირთვის" მქონე იყო და პირდაპირ მიემართებოდა უნგრეთის პარლამენტის გადაწყვეტილებას.

ფეხბურთის ასოციაციების კავშირის გადაწყვეტილება დაგმეს გერმანელმა პოლიტიკოსებმა. მათ შორის, მიუნხენის მერმა, დიტერ რაიტერმა. ამასთან, UEFA-ს უარის მიუხედავად, თამაშის დღეს ქალაქის სხვადასხვა ღირსშესანიშნაობა ლგბტქ დროშის ფერებში მაინც განათდება; მათ შორის, ქალაქის სატელევიზიო ანძა — ოლიმპიური კოშკი — და სხვა მაღალი შენობები, რომელიც სტადიონიდანაც ჩანს. ამასთან, ქვიარ აქტივისტები სტადიონის შესასვლელში გულშემატკივრებისთვის 11 ათასი ლგბტქ დროშის დარიგებას აპირებენ.

გერმანია-უნგრეთის შეხვედრა 23 ივნისს, თბილისის დროით საღამოს 11 საათზე დაიწყება.

რა ხდება უნგრეთში?

ცენტრალური ევროპის სახელმწიფოსა და ევროკავშირის წევრ ქვეყანაში ლგბტქ უფლებების საკითხი მას შემდეგ გაუარესდა, რაც 2010 წელს ხელისუფლებაში ულტრამემარჯვენე ფიდესის პარტია მოვიდა. პარტიამ, და მისმა ხელმძღვანელმა, ქვეყნის პრემიერმინისტრმა ვიქტორ ორბანმა უკვე შეიმუშავეს და განახორციელეს "კონსერვატიულ-ქრისტიანულ ღირებულებებზე" დაფუძნებული რამდენიმე დისკრიმინაციული კანონპროექტი.

გასულ წელს მთავრობის მოთხოვნით, ქვეყანაში მცხოვრებ ტრანსგენდერ ადამიანებს დაბადებისას განსაზღვრული სქესის საპირისპიროს დოკუმენტებში მითითება აეკრძალათ. ასევე 2020 წელს, პარტიამ მოითხოვა ერთი და იმავე სქესის მქონე წყვილების მიერ შვილის აყვანის აკრძალვა, რომელიც მალევე დააკმაყოფილა ქვეყნის პარლამენტმა.

აღსანიშნავია, რომ პარტიის ერთ-ერთ წევრ პოლიტიკოსსა და დიპლომატს, იოჟეფ საიერს, რომელიც ასევე გამოირჩეოდა ჰომოფობიური განცხადებებით, თანამდებობის დატოვება მას შემდეგ მოუწია, რაც ის ბრიუსელის გეი-ბარში, "დახურულ სექსწვეულებაზე" ბელგიურმა პოლიციამ დააკავა.

ცოტა ხნის წინ ევროკავშირის 16-მა წევრმა ქვეყანამ უნგრეთში განვითარებული მოვლენები კიდევ ერთხელ დაგმო და ევროკომისიას მოქმედებისკენ მოუწოდა.