ევროკომისიამ "ევროპის ეკონომიკური პროგნოზის" შესახებ ანგარიში გამოაქვეყნა, რომელშიც ერთი თავი საქართველოს ეთმობა.

2025-2026 წლის ეკონომიკურ პროგნოზში ევროკომისია წერს, რომ "კიდევ ერთი წლის ძალიან ძლიერი ზრდის შემდეგ, საქართველოს ეკონომიკური აქტივობა, სავარაუდოდ, შენელდება, მაგრამ 2025 და 2026 წლებში 5-6%-იან ნიშნულზე

დარჩება, რაც ნაწილობრივ ასახავს რუსეთის მიერ უკრაინაზე აგრესიის დადებით გავლენას. მოსალოდნელია, რომ ზრდა კვლავაც განპირობებული იქნება შიდა მოთხოვნით, განსაკუთრებით კერძო და სამთავრობო მოხმარებით. ინფლაცია, სავარაუდოდ, დროებით გაიზრდება ხელფასების ზრდისა და მოთხოვნის ზეწოლის გამო, სანამ ცენტრალური ბანკის სამიზნე მაჩვენებელს არ მიუახლოვდება".

ანგარიშის მიხედვით, 2024 წლის მაღალი (9.4%) ეკონომიკური ზრდის ფაქტორები კერძო და სამთავრობო მოხმარება იყო. თუმცა, იქვე აღნიშნულია, რომ მათი პროგნოზით, ზრდა შენელდება 2025 და 2026 წლებში, მაგრამ დარჩება სტაბილური 5-6%-ის ფარგლებში.

ამავე ანგარიშში და ნათქვამია, რომ 2025 წლის პირველ კვარტალში ბიზნესის ნდობა მნიშვნელოვნად გაუარესდა და ამის მიზეზი "ქვეყანაში არსებული პოლიტიკური არეულობაა".

"ბიზნესის ნდობა მნიშვნელოვნად გაუარესდა 2025 წლის პირველ კვარტალში, რაც ასახავს ქვეყანაში არსებულ პოლიტიკურ არეულობას. წმინდა ექსპორტის წვლილი ზრდაში უარყოფითი დარჩება, თუმცა 2024 წელთან შედარებით უფრო დაბალი, რადგან მოსალოდნელია, რომ მაღალი მოხმარებისა და ინვესტიციების შედეგად გამოწვეული საქონლის იმპორტის მოთხოვნა უფრო ძლიერი იქნება, ვიდრე მზარდი ტურიზმისა და სხვა მომსახურების ექსპორტის დადებითი წვლილი. პროგნოზი უჩვეულოდ მაღალი ხარისხის გაურკვევლობას ექვემდებარება შიდა პოლიტიკურ მოვლენებთან და რეგიონში გეოპოლიტიკური დაძაბულობის მიმდინარეობასთან დაკავშირებით, რამაც შეიძლება უარყოფითად იმოქმედოს ბიზნესისა და მომხმარებელთა განწყობაზე" — ნათქვამია ანგარიშში.

ამავე ანგარიშში ცალკე ქვეთავი ეთმობა ქვეყანაში შრომის ბაზრის მდგომარეობის გაუმჯობესებასა და ხელფასების ზრდას.

"ეკონომიკური ზრდის მხარდაჭერით, უმუშევრობის დონე მნიშვნელოვნად შემცირდა 2023 წლის 16.4%-დან 2024 წელს 13.9%-მდე და, სავარაუდოდ, 2025 და 2026 წლებშიც გაგრძელდება კლება, თუმცა უფრო ნელი ტემპით. დასაქმების მაჩვენებელი 2024 წელს 2.5 პროცენტული პუნქტით გაიზარდა, თუმცა ის შედარებით დაბალ დონეზე, 47.1%-ზე დარჩა. წინასწარი მონაცემები მიუთითებს ხელფასების ძალიან ძლიერ ზრდაზე, რეალურ პირობებში 15%-ით 2024 წელს, რაც ასახავს რამდენიმე ფაქტორს: რუსეთიდან მაღალკვალიფიციური მიგრანტების ხელფასების გავრცელებას, განსაკუთრებით IT სექტორში, ქართული კომპანიების მზაობას, კომპენსირება გაუწიონ ცხოვრების ხარჯების ზრდას, განსაკუთრებით ძირითად ქალაქებში საცხოვრებლის ქირის საკითხს, შრომის დეფიციტს ზოგიერთ საწარმოო სექტორში და ინფლაციის სწრაფ შემცირებას 2024 წელს. ხელფასების ზრდა, სავარაუდოდ, შემცირდება მომდევნო წლებში, მაგრამ ის პროდუქტიულობის ზრდაზე მაღალი დარჩება", — ნათქვამია ანგარიშში.