კინორეჟისორ დენის ვილნევის უახლესი ნამუშევრის, დიუნის მსოფლიო პრემიერა 3 სექტემბერს, ვენეციის 78-ე კინოფესტივალზე შედგება.

Warner Bros.-ს, რომელიც კინონამუშევრის დისტრიბუტორი კომპანიაა, ვენეციის კინოფესტივალი აქამდეც არაერთხელ გამოუყენებია საკუთარი ნამუშევრის საპრემიერო პლატფორმად. სწორედ აქ იხილეს მაყურებლებმა პირველად Joker, A Star Is Born და Gravity. ვილნევი კი ბოლოს ვენეციაში 2016 წლის კინოფესტივალზე იმყოფებოდა.

ფოტო: Warner Bros.

დიუნი საი-ფაი ჟანრის ამავე სახელწოდების მქონე კლასიკის, ფრენკ ჰერბერტის რომანის ეპიკური ეკრანიზაციაა. მასში მთავარ როლებს ტიმოთი შალამე, ზენდეია, რებეკა ფერგიუსონი, ოსკარ აიზეკი და ჯოშ ბროლინი ასრულებენ.

დიუნის სცენარი ვილნევმა ჯონ სპეიტსთან და ერიკ როთთან ერთად შექმნა. ასევე ვილნევი იყო კინონამუშევრის პროდიუსერი მერი პერენტთან, ქეილ ბოიტერთან და ჯო კარაჩოლო უმცროსთან ერთად.

მიუხედავად იმისა, რომ ჰერბერტის რომანის მიხედვით არაერთი სატელევიზიო სერიალი გადაუღიათ, ვილნევის ნამუშევარი მხოლოდ მეორე ოფიციალური სრულმეტრაჟიანი ეკრანიზაციაა. მანამდე დიუნის მიხედვით ფილმი დევიდ ლინჩმა გადაიღო 1984 წელს.

ახალი ფილმის პრემიერა რამდენჯერმე გადაიდო კორონავირუსის პანდემიის გამო. თუმცა, Warner Bros.-ის გადაწყვეტილებით, ფილმს აშშ-შიც იმავდროულად აჩვენებენ კინოთეატრებსა და HBO Max-ზე.

ვენეციის 2021 წლის კინოფესტივალი 1-დან 11 სექტემბრამდე გაიმართება.

ასევე იხილეთ: