წელს დაგეგმილ კინოპრემიერებს შორის მაყურებლები განსაკუთრებულად ელიან დენის ვილნევის ახალი ფილმის Dune ხილვას, რის გამოც ფილმის შესახებ ყველა ახალ ინფორმაციას გაფაციცებით აკვირდებიან.

რამდენიმე დღის წინ ჟურნალ Empire-ში გამოქვეყნებულ სტატიაში თავად რეჟისორმა ისაუბრა მომავალ ფილმზე და მათ შორის მთავარი გმირზე, პოლ ატრეიდესზე, რომლის როლსაც მსახიობი ტიმოთი შალამე ასრულებს:

"პოლი ძალიან მკაცრ გარემოში მუდმივი წვრთნებით იზრდებოდა, რადგან ის ჰერცოგის ვაჟია და ერთ დღეს სწორედ თავად უნდა დაიკავოს მამის ადგილი. თუმცა, რამდენადაც ის ამ მოვალეობისთვის ემზადება, ნამდვილად სურს კი მას ეს? ეს არის სწორედ ამ პერსონაჟის მთავარი წინააღმდეგობა. ეს მაიკლ კორლეონეს შემთხვევას ჰგავს The Godfather-დან, როცა ტრაგიკული ხვედრის გამო ის ხდები, ვინც არ გსურდა, რომ ყოფილიყავი", — ამბობს დენის ვილნევი.

რეჟისორმა ისაუბრა იმაზეც, რომ მას სურს დიუნი ორ ნაწილად გადაიღოს, პირველი ფილმი კი პოლ ატრეიდასის კაცად გახდომის გზაზე მოგვითხრობს:

"მისი გადარჩენა დამოკიდებული იქნება სწორ გადაწყვეტილებებსა და საშიშ გარემოში მის ადაპტაციაზე. ეს არის ძალიან ლამაზი ამბავი მასზე, ვინც ძალაუფლების სადავეებს აიღებს ხელში".

რეჟისორის განცხადებებთან ერთად ფილმიდან ტიმოთი შალამეს ორი ახალი კადრიც გავრცელდა:

ფოტო: Warner Bros. Pictures

ფოტო: Warner Bros.

ფილმიდან სხვა აქამდე გავრცელებული ფოტოების ნახვა შეგიძლიათ აქ.