ევროკავშირი დათანხმდა უზბეკური წარმოშობის რუსი ოლიგარქის, ალიშერ უსმანოვის სანქციების სიიდან ამოღებას. ამას წინ უძღოდა დამღლელი მოლაპარაკებები, რომლის დროსაც საფრანგეთმა მისი სიიდან ამოღება აზერბაიჯანიდან პატიმრების გათავისუფლებას დაუკავშირა. ამ ნაბიჯმა ბრიუსელში უკმაყოფილება გამოიწვია. ინფორმაციას Euronews ავრცელებს.

ევროპარლამენტის ცნობით, დიპლომატების თქმით, მეორე რუსი ოლიგარქი, მიხაილ ფრიდმანიც ამოიღეს სიიდან მას შემდეგ, რაც სლოვაკეთმა მისი სანქციების გახანგრძლივებას ვეტო დაადო.

ლუქსემბურგი აცხადებდა, რომ თუ უსმანოვი სიიდან ამოიშლებოდა, ფრიდმანიც იმავე ბედს გაიზიარებდა. ფრიდმანმა გაყინული აქტივების გამო ლუქსემბურგის წინააღმდეგ 16 მილიარდ დოლარიანი სარჩელი შეიტანა.

ელჩებმა გადაწყვეტილება სამშაბათს, ორკვირიანი დაძაბული და ხანგრძლივი მოლაპარაკებების შემდეგ მიიღეს, რამაც, როგორც Euronews წერს, ბლოკის სანქციების რეჟიმი კოლაფსის პირას მიიყვანა.

ორშაბათს ლატვიამ პროცესი შეაფერხა და განაცხადა, რომ მოსკოვზე ზეწოლის შესუსტების დრო ჯერ არ იყო. ბალტიისპირეთის ქვეყანამ პოზიცია სამშაბათს შეიცვალა და კონსტრუქციული თავშეკავება არჩია, რამაც აუცილებელი ერთსულოვნება უზრუნველყო.

იმის სანაცვლოდ, რომ ორი ცნობილი ბიზნესმენი სიიდან ამოეღოთ, ევროკავშირმა რუსეთის წინააღმდეგ ინდივიდუალური სანქციები უპრეცედენტო ვადით — 36 თვით გაახანგრძლივა.

ადრე ეს ზომები ყოველ ექვს თვეში ერთხელ განახლდებოდა, რაც წევრ ქვეყნებს დათმობების მოსაპოვებლად რეგულარულ შესაძლებლობას აძლევდა.

სანქციების სია ამჟამად 2600-ზე მეტ ადამიანს, ორგანიზაციასა და სტრუქტურას მოიცავს, რომლებიც უკრაინაში რუსეთის ომის მხარდაჭერაში არიან დადანაშაულებულები, მათ შორის არის ვლადიმერ პუტინიც.

მიუხედავად იმისა, რომ კომპრომისმა სანქციები დიდი ხნით შეინარჩუნა და მომავალში მოულოდნელი ვეტოებისგან დაიცვა, ორი ცნობილი რუსი ფიგურის ამოღებამ კიევის მწვავე პროტესტი გამოიწვია.

მოლაპარაკებების დასკვნით ეტაპზე უკრაინის პრეზიდენტმა ვოლოდიმირ ზელენსკიმ საჯაროდ მოუწოდა ბლოკს, უსმანოვი და ფრიდმანი შავ სიაში დაეტოვებინა.

გამოცემის ინფორმაციით, უზბეკურმა და ფრანგულმა მხარეებმა კულისებს მიღმა მიაღწიეს შეთანხმებას, რომლის მიხედვითაც აზერბაიჯანი უსმანოვის სიიდან ამოშლის სანაცვლოდ ციხიდან ორ ფრანგს გაათავისუფლებდა. აზერბაიჯანის პრეზიდენტმა ილჰამ ალიევმა ისინი უნდა შეიწყალოს.

საფრანგეთს ეს შეთანხმება ოფიციალურად არ დაუდასტურებია და მხოლოდ "ეროვნული უსაფრთხოების" საკითხზე მიანიშნა.