პარლამენტმა 2019 წლის 20-21 ივნისის მოვლენებზე ამნისტიის ოპოზიციის პროექტი ჩააგდო. პროექტს მხარი 17-მა დეპუტატმა დაუჭირა, 61-ის წინააღმდეგ.

ამნისტია 19 აპრილის შარლ მიშელის დოკუმენტის ფარგლებში შემუშავდა, რომელსაც ქართულმა ოცნებამ და ოპოზიციის ნაწილმა ხელი მოაწერა. თუმცა, ამნისტიის დეტალებზე შეთანხმება ვერ მოხერხდა და აპრილის ბოლოს ორი პროექტი დარეგისტრიდა, ხელისუფლების და ოპოზიციის. საბოლოო მიღებამდე ხელისუფლების მხრიდან კეთდებოდა განცხადებები, რომ ვარიანტების შეჯერება შესაძლებელი იყო. თუმცა, საბოლოოდ არც ერთი სადავო საკითხი არ იქნა გათვალისწინებული.

ოპოზიციის ვარიანტით, ამნისტია შეეხებოდა ყველას, ვინც 20-21 ივნისის მოვლენების დროს ჩაიდინა შემდეგი სახის დანაშაულები: ჯგუფური ძალადობის ორგანიზება, ხელმძღვანელობა ან მასში მონაწილეობა; სამსახურებრივი უფლებამოსილების გადამეტება, ძალადობით ან იარაღის გამოყენებით. ამასთან, ამ შემთხვევაში აუცილებელი იქნებოდა შესაბამისი დაზარალებული პირის ნოტარიალურად დამოწმებული წერილობითი თანხმობა.

ამასთან, ამნისტია არ უნდა შეხებოდა იმ პირებს, რომლებიც 20 ივნისის მოვლენების დროს სახელმწიფო პოლიტიკურ თანამდებობაზე იმყოფებოდნენ და დანაშაული ჩადენილი აქვთ უფლებამოსილების გადამეტებით, ძალადობით ან იარაღის გამოყენებით.

წვრილმანი ხულიგნობის, სამართალდამცველის კანონიერი მოთხოვნისადმი დაუმორჩილებლობლობის, შეკრების ან მანიფესტაციის ორგანიზებისა და ჩატარების წესის დარღვევისთვის ადმინისტრაციული წესით დაჯარიმებულები კი სახდელისგან გათავისუფლდებოდნენ, თუ ეს ჯარიმა უკვე გადახდილი არ ექნებოდათ.

ამ კანონპროექტში ასევე გათვალისწინებული იყო ის, რომ ვისაც ამნისტია შეეხებოდა, სასამართლოში გასაჩივრება შეეძლებოდა.