მარტო სახლში (Home Alone) და მისი გაგრძელება, მარტო სახლში 2: ნიუ-იორკში დაკარგული, ნამდვილი საშობაო კლასიკაა, რომლებსაც მსოფლიოში მილიონობით მაყურებელი ყოველწლიურად ისევ უბრუნდება ხოლმე სადღესასწაულოდ. თუმცა, ზოგმა გვიან შენიშნა, რომ 1992 წელს გამოსულ ფილმში მარტო სახლში 2 აშშ-ის პრეზიდენტი დონალდ ტრამპი ეპიზოდური როლით ჩნდება.

კევინს, მაკოლეი კალკინის პერსონაჟს, რომელიც ნიუ-იორკში დაიკარგება და სასტუმრო პლაზაში ამოყოფს თავს, დონალდ ტრამპი გზას მიასწავლის. ამ სასტუმროს მაშინ სწორედ ტრამპი ფლობდა და ფილმის რეჟისორის, კრის კოლამბუსის თქმით, აშშ-ის მოქმედმა პრეზიდენტმა დაჟინებით მოითხოვა, ფილმში გამოჩენილიყო.

"თანხა გადავუხადეთ, მაგრამ სხვა პირობაც წაგვიყენა: მხოლოდ იმ შემთხვევაში გადაიღებთ პლაზაში, თუკი მეც ვიქნები ფილმშიო", — იხსენებს კოლამბუსი 2020 წლის ინტერვიუში, — "დავთანხმდით და როცა ფილმი მაყურებელს პირველად ვუჩვენეთ, ტრამპის ეკრანზე გამოჩენას ხალხი ოვაციებით შეხვდა. ამიტომ, მემონტაჟეს ვუთხარი, ეს კადრი დატოვე-მეთქი".

თუმცა, ვინ იფიქრებდა, რომ კრისი ამ გადაწყვეტილებას სამ ათწლეულზე მეტი ხნის შემდეგაც კი ინანებდა. ტრამპის ჯერ კიდევ პირველი ვადით არჩევის შემდეგ, მაყურებლები ფილმიდან პრეზიდენტის 7-წამიანი სცენის ამოჭრას ითხოვდნენ. სხვათა შორის, ამ მოთხოვნას თავად მაკოლეი კალკინმაც დაუჭირა მხარი.

ახლა კი, როგორც ჩანს, რეჟისორიც იმავე აზრზეა.

"წყევლად მექცა. მოსვენებას არ მაძლევს. ნეტავ, საერთოდ გაქრებოდეს", — ამბობს კოლამბუსი უახლეს ინტერვიუში, — "თუმცა, ვერ ამოვჭრი. რომ ამოვჭრა, ალბათ ქვეყნიდან გადამასახლებენ. აშშ-ში ცხოვრებისთვის უღირსად ჩამთვლიან და იტალიაში ან სადმე სხვაგან მომიწევს გადაბარგება".

სხვათა შორის, კოლამბუსის მონაყოლისგან სრულიად განსხვავებულ ისტორიას იხსენებს თავად ტრამპი, რომელიც ფილმიდან მისი ამოჭრის მოთხოვნას 2023 წელს გამოეხმაურა სოციალურ ქსელში. პრეზიდენტის თქმით, მაშინ "ძალიან დაკავებული იყო" და ფილმში გამოჩენა არ სურდა, მაგრამ რეჟისორი "ეხვეწებოდა", უარი არ ეთქვა.

"ამ პატარა სცენასაც და ფილმსაც დიდი წარმატება მოჰყვა. ხალხი დღემდე მირეკავს, როცა ტელევიზორში გადის", — განაცხადა ტრამპმა, — "ახლა კი, 30 წლის შემდეგ, კოლამბუსი ამბობს, რომ ფილმში გამოჩენას დაჟინებით ვითხოვდი. ეს სიმართლისგან ძალიან შორსაა. ფილმს კი წარმატება სწორედ ამ სცენამ მოუტანა".

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...