ენმ-ს ხელისუფლების საქმიანობის შემსწავლელ დროებით საგამოძიებო კომისიაზე არ გამოცხადების გამო გივი თარგამაძეს სასამართლომ 10 000-ლარიანი გირაო შეუფარდა.

გივი თარგამაძე პარლამენტში, დროებით საგამოძიებო კომისიაზე 3 აპრილს დაიბარეს, მან გამოცხადებაზე უარი განაცხადა. გივი თარგამაძე 11 აპრილს მაგისტრატი მოსამართლის წინაშე გამოიკითხა.

მას პროკურატურამ ბრალდება სისხლის სამართლის კოდექსის 349-ე მუხლით წარუდგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს და ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

თარგამაძის თქმით, ეს კომისია "რუსების შეკვეთაა".

"კითხვაც აღარ დარჩა, როცა კომისიის თავმჯდომარემ გვამცნო, რომ საქართველოს ეროვნული გმირი, გიორგი ანწუხელიძე „ვიღაცის პიარს შეეწირა“. გასაგებია, რისთვისაცაა ეს კომისია შექმნილი. პირდაპირ შეიძლება ვთქვათ, რომ ეს არის რუსების შეკვეთა. არსის ჩანაცვლება ხდება, პუტინს მისცენ საჩუქრად დასკვნა, რომ ჩვენ თვითონ დავიწყეთ ომი, რომელსაც ის გამოიყენებს შემდგომ უკრაინისთვისაც, იტყვის, რომ უკრაინამ თვითონ დაიწყო და ა.შ. ისტორიის გადაწერის პირდაპირი მცდელობაა", — განაცხადა გივი თარგამაძემ.

შეგახსენებთ, რომ 2004-2016 წლებში გივი თარგამაძე ენმ-ს სიით 3 მოწვევის პარლამენტის წევრი იყო, ხოლო 1997-2003 წლებში საქართველოს პრეზიდენტთან არსებული ანტიკორუფციული პოლიტიკის საკოორდინაციო საბჭოს შემადგენლობაში შედიოდა.