გდდ-ს ყოფილი მაღალჩინოსანი, ირაკლი შაიშმელაშვილი სოციალურ ქსელში ენმ-ს ხელისუფლების საქმიანობის შემსწავლელი დროებითი საგამოძიებო კომისიის მუშაობას ეხმაურება და წერს, რომ ჩორჩანა იყო ერთადერთი პრეცედენტი, როდესაც სახელმწიფომ დროული და პრინციპული რეაგირებით შეძლო საკუთარი ტერიტორიის დაცვა. შაიშმელაშვილი ასახელებს 3 საკითხს, რომლებსაც კომისია უნდა იძიებდეს:

"ჩორჩანა იყო ერთადერთი პრეცედენტი, როდესაც სახელმწიფომ დროული და პრინციპული რეაგირებით შეძლო საკუთარი ტერიტორიის დაცვა!

რას უნდა იძიებდეს თვითმარქვია კომისია:

1. გინტურის მკვლელობა – რატომ ვერ დაიცვა სახელმწიფომ საკუთარი მოქალაქე საოკუპაციო ხაზზე? (მკვლელებს რომ ვერ და არ დაადგენთ ეს ისედაც ცხადია)

2. საოკუპაციო ხაზიდან დაახლოებით 100 გატაცებული მოქალაქის საქმე – რატომ ვერ უზრუნველყოფს სახელმწიფო იმ ადამიანების დაცვას, რომლებიც მის მიერ კონტროლირებად ტერიტორიაზე ცხოვრობენ?

3. ე.წ. "მკვდარი ზონები" საოკუპაციო ხაზზე — რატომ არ ხდება მათი ეფექტური მონიტორინგი და გადაფარვა? ბოლო სამი წლის განმავლობაში მომზადებული ანგარიშები და ბრიფინგები რატომ (ან ვისი ინტერესით) იგნორდებოდა?

P.S. ქ-ნო თეა, მწყემსების და იმბეცილების შედგენილ ინფორმაციას ბოლომდე ნუ დაეყრდნობით მაინც

ესე გააგრძელეთ — რუსეთი არ გააღიზიანოთ!!!", — წერს შაიშმელაშვილი.

შსს-ს განსაკუთრებულ დავალებათა დეპარტამენტის ყოფილმა მაღალჩინოსანი, ირაკლი შაიშმელაშვილმა უწყება 2024 წლის დეკემბრის დასაწყისში დატოვა, 23 დეკემბერს კი ქვეყნიდან წავიდა. მედიაში გავრცელებული ინფორმაციით ირაკლი შაიშმელაშვილი აშშ-ში იმყოფება.

შეგახსენებთ, რომ 14 აპრილს 12:00 საათზე ენმ-ს ხელისუფლების საქმიანობის შემსწავლელი დროებითი საგამოძიებო კომისიის სხდომაზე პარტია გახარია საქართველოსთვის ლიდერი, გიორგი გახარია დაიბარეს.

13 აპრილის საღამოს, პარტიის პრესსამსახურმა გაავრცელა ინფორმაცია, რომ ზუსტად ამ დროს, 14 აპრილს, 12:00 საათზე გიორგი გახარია ბრიფინგს გამართავდა. დილით კი ამავე პრესსამსახურმა დაგვიდასტურა, რომ გიორგი გახარია კომისიაზე წარდგენას აპირებდა.

ჩორჩანას საგუშაგოს გახსნის საკითხზე სწორედ ამ სხდომაზე იმსჯელეს. ქართული ოცნება გიორგი გახარიას ედავება, რომ შს მინისტრობის დროს თვითნებურად გახსნა საგუშაგო ჩორჩანაში, რამაც ადგილზე ვითარების დაძაბვა გამოიწვია.

გიორგი გახარიამ წულუკიანის კომისიაზე თქვა, რომ ტყეში პატრულირებდა საოკუპაციო რეჟიმი, აკავებდნენ საქართველოს მოქალაქეებს და აპირებდნენ საოკუპაციო ხაზის გაფართოებას ახალგამოჩენილი, 1992 წლის ე.წ. რუკებით, რაც ჩორჩანის ტყის მასივის 1800 ჰექტრის მითვისებას გამოიწვევდა.

"დასწრების პრინციპით გავაკეთეთ ის, რაც გავაკეთეთ… გავიყვანეთ, გავწმინდეთ გზა და გავაკეთეთ საგუშაგოები. პირველი შემთხვევა იყო, რომ დავიცავით ამხელა ტერიტორიები და საოკუპაციო ხაზი გადმოწეული არ არის", — განაცხადა გახარიამ საგამოძებო კომისიის სხდომაზე..