ესპანელ არქიტექტორ ანტონი გაუდის კათოლიკე ეკლესია წმინდანად შერაცხავს. შესაბამისი პროცედურები ვატიკანმა უკვე დაიწყო. "ღმერთის არქიტექტორად" წოდებულ გაუდის, რომლის ყველაზე ცნობილი ნამუშევარი ბარსელონის საგრადა-ფამილიას ბაზილიკაა, ვატიკანი "საგმირო სათნოებებს" მიაწერს. პაპი ფრანცისკეს განკარგულებით, კატალონიელ არქიტექტორს "მაღალღირსის" წოდება მიენიჭა, ეს კი წმინდანად შერაცხვის პროცესის საწყისი ეტაპია.

ვატიკანის გადაწყვეტილებას სიხარულით შეხვდნენ ბარსელონაში. ქალაქის მთავარეპისკოპოსის, კარდინალ ხუან ხოსე ომეიას თქმით, ეს არა მხოლოდ გაუდის არქიტექტურული შემოქმედების დაფასებაა, არამედ "კიდევ უფრო მნიშვნელოვნისაც".

კათოლიკე ეკლესიაში წმინდანად შერაცხვის მომდევნო ეტაპი ბეატიფიკაცია, ანუ ნეტარად შერაცხვაა. ეს ნიშნავს, რომ წმინდანობის კანდიდატს "სასწაულის" მოხდენა უკავშირდება. ამდენად, საეკლესიო კანონიკით, საჭირო იქნება, დადასტურდეს, რომ გაუდის სახელს ერთი "სასწაული" მაინც მიეწერება.

ფოტო: Sylvain Sonnet / Getty Images

1852 წელს დაბადებული ანტონი გაუდის ნამუშევრები დღემდე მილიონობით ტურისტს იზიდავს ბარსელონაში, რომელიც არქიტექტორის მემკვიდრეობის უმეტეს ნაწილს უყრის თავს. რაც შეეხება საგრადა-ფამილიას, ტაძრის მშენებლობას გაუდიმ თავისი ცხოვრების 40 წელზე მეტი შეალია, მაგრამ მისი გარდაცვალებისას პროექტის მეოთხედიც კი არ იყო დასრულებული. არქიტექტურული შედევრი, რომლის აგებაც 1883 წელს დაიწყო, დღემდე დაუსრულებელია; თითქმის საუკუნენახევრიანი მოლოდინის შემდეგ, ტაძრის მშენებლობა მომავალ წელს დამთავრდება.

1984 წელს UNESCO-მ გაუდის ნამუშევრები, მათ შორის საგრადა-ფამილია, მსოფლიო მემკვიდრეობის სიაში შეიყვანა. პაპი ბენედიქტე XVI-ის გადაწყვეტილებით კი, 2010 წლიდან ტაძარში საეკლესიო მსახურებაც მიმდინარეობს.