15 აპრილს, ტელეკომპანიებმა იმედი და რუსთავი 2 გაავრცელეს ინფორმაცია, რომ პოლიციელმა, რომელსაც 29 ნოემბერს აქციაზე "აქტივისტებმა ბლაგვი საგანი ესროლეს", მხედველობა დაკარგა. მათი თქმით, "რადიკალური ოპოზიციის პროპაგანდისტულ მედიებს ფაქტი ამ დრომდე არ გაუშუქებიათ".

იმის გასარკვევად, ვინ არის დაზარალებული პოლიციელი, კონკრეტულად რა დაზიანება მიიღო, გაავრცელა თუ არ აღნიშნული ინფორმაცია უწყებამ აქამდე და თუ არ გაუვრცელებია, საიდან მოიპოვა იმედმა ცნობები დაშავებული პოლიციელის შესახებ, NEWS.On.ge შსს-ს დაუკავშირდა.

პირველი მცდელობისას პრესსამსახურის წარმომადგენელმა გვითხრა, რომ მათ აღნიშნული ინფორმაცია ყველა იმ მედიას დაუდასტურეს, რომელიც მათ დაეკონტაქტა. რაც შეეხება დაზარალებული პოლიციელის ვინაობასა და მასზე დამატებითი ინფორმაციას, გასარკვევად მოგვიანებით დაკავშირება გვთხოვეს.

NEWS.On.ge შსს-ს კიდევ ერთხელ დაუკავშირდა, მაგრამ მათ არც იმაზე მოგვაწოდეს ინფორმაცია საიდან მოიპოვა იმედმა ცნობები დაზარალებულ პოლიციელზე, როდესაც აღნიშნულის შესახებ შსს-ს განცხადება არ გაუვრცელებია და არც ის გვითხრეს, ვინ არის დაზარალებული პოლიციელი.

"ვერ მოგაწოდებთ ინფორმაციას, არ ვიყავი ამ კვირას სამსახურში" — განგვიცხადეს შსს-ს პრესსამსახურში.

შეგახსენებთ, რომ ტვ იმედმა გუშინ, 15 აპრილს გაავრცელა ინფორმაცია, სადაც ნათქვამია, რომ "ნოემბრის ძალადობრივ აქციებზე, მომიტინგეების ნასროლი ბლაგვი საგნით პოლიციელმა მხედველობა დაკარგა და რადიკალური ოპოზიციის პროპაგანდისტულ მედიებს ფაქტი ამ დრომდე არ გაუშუქებიათ".

"რადიკალური ოპოზიციის პროპაგანდისტული მედიების ჩამონათვალშია: პუბლიკა, ნეტგაზეთი, ფორმულა, მთავარი არხი, ტვ პირველი.

პუბლიკის დირექტორის, ზურა ვარდიაშვილის ფეისბუქ-პოსტში ვკითხულობთ, რომ შსს-მ მათთან საუბრისას განაცხადა, რომ მათ არ გაუვრცელებიათ ინფორმაცია დაზარალებულ პოლიციელზე და გაარკვევდნენ.

"სამთავრობო პროპაგანდისტულმა ქარხანამ, იმედმა, გამოდო ნიუსი, რომ 29 ნოემბერს პოლიციელი ისე დაშავდა, რომ მხედველობა დაკარგაო. შსს გვიდასტურებსო.

დავურეკეთ შსს-ს, დავუსვით კითხვები. ასე უაპელაციოდ ხომ ვერ ენდობი მთავრობის რუპორს. შსს-მ განცხადება არ გაგვივრცელებია და გაგირკვევთო, მას შემდეგ ჩვენს რამდენიმე ზარს არ უპასუხეს.

ამის მერე ადგა ტ/კ იმედი და გაქარდა, რომ, აიო "ოპოზიციის პროპაგანდისტული მედიებიო", არ აშუქებენ პოლიციელი რომ დაშავდაო. ჩვენ, ნეტგაზეთს და ა.შ. უწოდებენ ეგენი პროპაგანდისტებს.

მაგათი ვიღაც ნათიას ნომერი მომცეს და მივწერე - ცილს გვწამებთ, თავად შსს არ გვაძლევს ინფორმაციას, თქვენ ხომ არ დაგეყრდნობით მეთქი და,
ახლა ადგნენ და ქარდს მიაწერს, აზუსტებს პუბლიკაო." — წერს ზურა ვარდიაშვილი.

შეგახსენებთ, ამ დროისთვის ნოემბრის აქციებზე პოლიციელზე თავდასხმის ბრალდებით დაკავებულია 20-ზე მეტი პირი, მათ შორის — გამოცემა ბათუმელები და ნეტგაზეთის დირექტორი მზია ამაღლობელი, აქტივისტები საბა სხვიტარიძე და მათე დევიძე და ჯგუფურ ძალადობის მუხლით კიდევ 19 ადამიანი.