რას ნიშნავს მადლობა თქვენთვის?

ყოველდღიურად ალბათ არაერთხელ ამბობთ ამ სიტყვას და თავადაც იღებთ მას. ვახშმობისას ოჯახის წევრის მიერ მოწოდებული პურით დაწყებული, მაღაზიაში მომსახურე პერსონალის გაწეული დახმარებით დამთავრებული — მადლობას ვიხდით სხვადასხვა სიტუაციაში და ეს, რა თქმა უნდა, ძალიან კარგია. მადლიერება ის გრძნობაა, რომელსაც ორმაგი სარგებლის მოტანა შეუძლია, როგორც გამღებისთვის, ასევე მიმღებისთვის. თავს უკეთ გრძნობთ, როცა მადლობის გადახდის შემდეგ ორივე იღიმით.

თუმცა, მადლიერების გამოხატვის სხვა საშუალებებიც არსებობს. მაგალითად, სამადლობლის დატოვება. სამადლობელი იგივე "თიფია", რომლის გადახდაც რესტორნებში, კაფეებსა და მომსახურების სხვა ობიექტებში შეიძლება.

და მაინც, რატომ უნდა გადაიხადო სამადლობელი? წარმოგიდგენთ 5 მიზეზს, რატომაც უნდა მიეცეს მადლობის გადახდას ასეთი ფორმა.

1. სავალდებულო არაა, არჩევანია

ზემოთ უკვე ვახსენეთ, რომ სამადლობლის დატოვება "შეიძლება". რა თქმა უნდა, თქვენ არავინ დაგავალდებულებთ, რომ მომსახურების საფასური გადაიხადოთ, რაც არჩევანის საშუალებას გიტოვებთ. ეს მიანიშნებს, რამდენად მოკრძალებული ჟესტია სამადლობლის დატოვება. თუმცა, არ გეგონოთ, რომ ეს ეგრეთ წოდებული დანამუსებაა. უბრალოდ, მადლობის ნიშნად, სურვილის შემთხვევაში, შეგიძლიათ დატოვოთ იმდენი, რამდენიც გსურთ. ხოლო რატომ უნდა გადაიხადოთ აუცილებლად, თუკი შესაძლებლობა გაქვთ, ამაზე მეტს შემდეგ პუნქტებში ვისაუბრებთ.

2. გამოხატავთ, რომ ნამდვილად მოგეწონათ

როცა მშობლებს ან ბებია-ბაბუას ვსტუმრობთ და ისინი გემრიელობებით გვიმასპინძლდებიან, ხშირად სხდებიან ჩვენ გვერდით და ღიმილით გვიყურებენ. რასაკვირველია, ისინი არც მადლობის გადახდას ელოდებიან და, მით უმეტეს, არც "თიფს". უბრალოდ, სურთ, გაიგონ, რომ მათი ნახელავი ნამდვილად მოგეწონათ.

ასევეა მომსახურების ობიექტებშიც. იქ ყველას სურს, რომ მომხმარებელი კმაყოფილი იყოს. შესაბამისად, თუკი კერძიც, მომსახურებაც და ატმოსფეროც მოგეწონათ, მადლობასთან ერთად სამადლობელიც შეგიძლიათ გადაიხადოთ,

3. სხვის შრომას აფასებთ

თუკი მიმტანად არასდროს გიმუშავიათ, ალბათ არც ის გეცოდინებათ, რამდენად შრომატევადი საქმეა ეს. როცა რესტორანში ან კაფეში მიდიხართ, მიმტანები ღიმილით გხვდებიან და მენიუს გთავაზობენ, შემდეგ კი, შეკვეთაც მოაქვთ, თუმცა, არ გეგონოთ, რომ საქმე მხოლოდ ამით შემოიფარგლება. ისინი ობიექტის გახსნამდე რამდენიმე საათით ადრე მიდიან, რომ მომხმარებლებს სასიამოვნო გარემო დაახვედრონ. შესაბამისად, გადახდილი სამადლობლით აფასებთ იმასაც, რაც ხშირად და ბევრისთვის, სამწუხაროდ, შეუმჩნეველი რჩება.

4. "მოექეცი სხვებს ისე, როგორც გინდა, რომ მოგექცნენ"

ეს ალბათ ერთგვარად წინა პუნქტიც გაგრძელებაცაა, თუმცა, აუცილებელია, რომ სანამ სხვა ადამიანის საქმეზე შეხედულებას ჩამოიყალიბებთ, თავი მათ ადგილას წარმოიდგინოთ, ან, როგორც ინგლისურად ამბობენ, "სხვისი ფეხსაცმელები ჩაიცვათ".

• "მაგათ ხომ ისედაც უხდიან" — ბევრისთვის სამადლობელი შემოსავლის ძირითადი წყაროა.
• "რას მეცხვირებოდა, რატომ უნდა დავუტოვო სამადლობელი" — შენამდე ბევრ საქმესა და სტრესთან გამკლავება მოუწია.
• "საშინლად მომემსახურა, არ იმსახურებს" — თუ რამე არ მოგეწონათ, შეგიძლიათ, პირდაპირ, ზრდილობის ფარგლებში უთხრათ და მისი "დასჯა" შემოსავლის მოჭრით არ გადაწყვიტოთ.
• "რატომ უნდა გადავიხადო, მე არ მიხდიან" — სავარაუდოდ, სხვა სფეროში ხართ დასაქმებული, სადაც ანაზღაურების მსგავსი ფორმა არ მოქმედებს.
• "სავალდებულო არაა, რატომ უნდა გადავიხადო" — ბევრი რამ არ არის სავალდებულო, თუმცა, სასურველია.
• "ცუდი მომსახურების გამო თუ ახლა არ გადავიხდი, მომავალში გამოსწორდებიან" — კვლავაც განვმეორდებით: ყველაფერს ჯობს, პირდაპირ, როგორც იტყვიან, მიკიბ-მოკიბვის გარეშე უთხრათ პასუხისმგებელ პირს შენიშვნა, რომელსაც, დარწმუნებული იყავით, გაითვალისწინებენ.

5. ასე სხვისი დღის გახალისებაც შეგიძლიათ

მოკლედ, ზემოთ ჩამოთვლილი "არგუმენტებით" ალბათ მიხვდებოდით, რომ მიმტანებს დღის განმავლობაში ბევრი სხვადასხვაგვარი ხასიათის და დამოკიდებულების მქონე ადამიანთან გამკლავება უხდებათ. თუკი, ღიმილი დროის უდიდესი ნაწილის განმავლობაში თქვენ არ შეგხვდათ და მიმტანიც "დაცხვირული" დაგხვდათ, დიდი ალბათობით, სულ ახლახან ჰქონდა უსიამოვნო გამოცდილება.

თუ გადაწყვეტთ, რომ როგორც მოწყენილი მეგობარი, ისე გაამხიარულოთ, ან, უბრალოდ, სოლიდარობა გამოხატოთ მის მიმართ, სამადლობლის დატოვება ამისთვის შესანიშნავი გზაა.

ბონუსი: "რასაცა გასცემ, შენია..."

დასაწყისში უკვე ვახსენეთ, რომ მადლობის გადახდა ორმაგი სარგებლის მომტანია. არაერთი კვლევით დადასტურებულია, რომ მადლიერების გამოხატვა ჩვენს მენტალურ კეთილდღეობაზე დადებითად აისახება.

თანაც, როცა იმ რესტორანს ან კაფეს, სადაც სამადლობელი დატოვეთ, კიდევ ერთხელ ესტუმრებით. დარწმუნებული იყავით, რომ წინაზე უკეთესი გამოცდილება გელოდებათ.

სამადლობლის გადასახდელად საქართველოს ბანკი შესანიშნავ გზას გთავაზობთ — თუკი "თიფის" დატოვება გსურთ, თუმცა ნაღდი ფული თან არ გაქვთ, გადახდას უნაღდო ანგარიშსწორებით, სპეციალურად ამ ფუნქციის მქონე ტერმინალით შეძლებთ.