თურქეთის ხელისუფლებამ თურქეთის, პრეზიდენტი რეჯეფ თაიფ ერდოღანის მთავარი კონკურენტი, სტამბულის მერი ეკრემ იმამოღლუ კორუფციისა და ტერორის გამოძიების ფარგლებში დააკავა, — ამის შესახებ CNN იუწყება.

Anadolu Agency-ის ცნობით, დაკავების ორდერი მერთან დაკავშირებულ 100-მდე პირზე, მათ შორის მის პრეს-მრჩეველ მურატ ონგუნზეც გამოიცა.

დაკავება არჩევნებამდე რამდენიმე დღით ადრე მოხდა. როგორც თურქული მედია წერს, მთავარ ოპოზიციურ რესპუბლიკურ სახალხო პარტიას (CHP) იმამოღლუ საპრეზიდენტო კანდიდატად უნდა დაესახელებინა. ერთი დღით ადრე, სტამბოლის უნივერსიტეტმა იმამოღლუს დიპლომი გაუუქმა, რითაც ფაქტობრივად პოპულარული ოპოზიციური ფიგურის საპრეზიდენტო არჩევნებიდან დისკვალიფიკაცია მოახდინა.

კრიტიკოსები აცხადებენ, რომ დაკავებები პოლიტიკურ ნიადაგზე მოხდა და სხვა არაფერია თუ არა ოპოზიციაზე ანგარიშწორება გასულ წელს ადგილობრივ და მერის არჩევნებში ერდოღანის დიდი დამარცხების შემდეგ.

"ხალხის სახელით გადაწყვეტილებების მიღება, ხალხის ნების შესაცვლელად, ან მის დასაბრკოლებლად ძალის გამოყენება არის გადატრიალება. ამჟამად არსებობს ძალა, რომელიც ხელს უშლის ერს განსაზღვროს ვინ იქნება მომავალი პრეზიდენტი" — განაცხადა CHP-ის ლიდერმა ოზგურ ოზელმა X-ზე გამოქვეყნებულ პოსტში.

იმამოღლუს დაკავების შემდეგ, "საზოგადოებრივი წესრიგის შესანარჩუნებლად" სტამბოლის გუბერნატორმა 23 მარტამდე ქალაქში აქციის გამართვია აკრძალა. გუბერნატორმა დასძინა, რომ სტამბოლის ცენტრში მეტროპოლიტენის ზოგიერთი გაჩერება და გზა ჩაკეტილია.

ინტერნეტ-დამკვირვებლის NetBlocks-ის თანახმად, თურქეთში X-ზე, YouTube-ზე, Instagram-სა და TikTok-ზე წვდომა შეიზღუდა.

იმამოღლუს და მასთან დაკავშირებულ 100-მდე სხვა ბრალდებულს კრიმინალური ორგანიზაციის წევრობაში, გამოძალვაში, მექრთამეობასა და თაღლითობაში ედავებიან. იმამოღლუს წინააღმდეგ ასევე მიმდინარეობს გამოძიება ქურთისტანის მუშათა პარტიის დახმარებასთან დაკავშირებით, რომელსაც თურქეთი ტერორისტულ ორგანიზაციად მიიჩნევს.

იმამოღლუ მერად ორჯერ — 2019 წელს და 2024 წელს აირჩიეს. შემდეგი საპრეზიდენტო არჩევნები 2028 წელს არის დაგეგმილი, მაგრამ ერდოღანს ვადამდელი არჩევნების დანიშვნა შეუძლია, რაც მას ვადის ლიმიტების შეცვლის შესაძლებლობას მისცემს.