19 მარტს, 19:00-ზე სტუდენტები ახალ საპროტესტო კერას განათლების სამინისტროსთან ქმნიან.

ორგანიზატორების განცხადებაში ვკითხულობთ, რომ ეს იქნება სივრცე, სადაც ისინი ისაუბრებენ განათლების სისტემაში არსებულ სიღრმისეულ პრობლემებზე და იმ გამოწვევებზე, რომლებიც უნივერსიტეტებსა და სკოლებში დღევანდელი არალეგიტიმური ხელისუფლების დანაშაულებრივი ქმედებებისა თუ უმოქმედობის შედეგია.

"19 მარტიდან სტუდენტები ვქმნით ახალ საპროტესტო კერას. ეს იქნება სივრცე, სადაც ხმამაღლა ვისაუბრებთ ჩვენს პროტესტზე, განათლების სისტემაში არსებულ სიღრმისეულ პრობლემებზე და იმ გამოწვევებზე, რომლებიც უნივერსიტეტებსა და სკოლებში დღევანდელი არალეგიტიმური ხელისუფლების დანაშაულებრივი ქმედებებისა თუ უმოქმედობის შედეგია. შეკრების პირველი ადგილი განათლების სამინისტრო იქნება.

თითოეული ჩვენგანი იბრძვის თავისუფალი, სამართლიანი და ღირსეული ქვეყნისთვის, სადაც განათლება პრიორიტეტულია, სადაც სტუდენტებსა და აკადემიურ პერსონალს არა თუ აშანტაჟებენ, არამედ უსმენენ და აფასებენ კრიტიკულ ხედვას.

ჩვენ არ ვაპირებთ თვალის დახუჭვას იმაზე, თუ როგორ ინგრევა განათლების სისტემა და როგორ ცდილობენ მომავალ თაობას დამოუკიდებელი აზროვნება, თავისუფლება და კრიტიკული ხედვის ჩამოყალიბების შესაძლებლობა წაართვან.
დამხობა რეჟიმს, თავისუფლება ტყვეებს!," — ვკითხულობთ ორგანიზატორების განცხადებაში.

ასევე იხილეთ: