ჟურნალისტი ნიკა კაცია ესტონეთის მიერ სანქცირებულმა მოსამართლემ, თამარ მჭედლიშვილმა პატიმრობაში დატოვა.

კაციამ სასამართლო პროცესზე განაცხადა, რომ უდანაშაულოა და თავისი საქმის გამოძიებას ითხოვს. მისი განცხადებით, პროკურატურამ მისი ადვოკატის მიერ ჩატარებული გამოძიება საქმის მასალებში გადმოიტანა, მანამდე ისინი სასამართლოში "ფარატინა" ფურცლით წარდგნენ.

"როცა ვსაუბრობდით მტკიცებულებების მოპოვებაზე, მახსოვს თქვენი ფრაზა — დაცვის მხარეს აქვს უფლება, კანონიერად მოიპოვოს მტკიცებულებები.

ის, რომ მე სახლთან დამაკავეს და არა იმ მისამართზე, რომელიც მითითებულია საქმის მასალებში, ეს ძალიან მნიშვნელოვანი გარემოებაა. ერთადერთი მტკიცებულებაა და ზუსტად ის, რასაც ახლა ვისმენდით მონოლოგის სახით ზუსტად იმას ნიშნავს, რომ იმ ერთადერთი მტკიცებულების განადგურების მცდელობაა საქმის დანარჩენ სხვა მასალებთან ერთად, რომლებიც ჩადებულია და რომელიც, სხვათა შორის, ჩემი ადვოკატის დამსახურებაა. ფარატინა ფურცლით იყო წარმოდგენილი პროკურატურა, აბსოლუტურად ფარატინა. ჩვენგან გადაიტანეს — ჩვენ ჩავატარეთ რეალურად გამოძიება.

ძალიან მნიშვნელოვანია ტაქსის მძღოლის იქ ყოფნა, იმიტომ რომ ჩემი ტელეფონიდან ამოღებული რუკით დგინდება, სად დამაკავეს. ამასობაში იმას, რასაც მე ვლაპარაკობ, ოღონდ გამოკითხვა რომ არ ჩაუტარებიათ, ესეც ცალკე უბედურება და აბსურდია და ამაზეც მინდოდა მეთქვა — მეოთხე თვე ხდება 7 აპრილს, როცა გამოძიება არც შემთხვევაში და არანაირად არ იწყება. ვითხოვ გამოძიებას, რატომ არ იწყება გამოძიება," — განაცხადა კაციამ.

კაციამ ასევე ისაუბრა საქმის მასალებში მის დაკავების ადგილის უზუსტობაზე, რომ ის სახლთან დააკავეს და არა საქმის მასალებში მითითებულ მისამართზე.

"მე სახლთან დამაკავეს და არა იმ მისამართზე, რომელიც მითითებულია საქმის მასალებში [...] ადამიანმა 3 დეკემბერს გადამიღო ვიდეო, რომლის საფუძვლადაც შემდეგ შეთითხნეს, რომ ამას ტატუები აქვს და მოდი, ნარკოტიკს ჩავუდებ." — განაცხადა კაციამ.

სასამართლოზე კაციამ მოსამართლეს მიმართა, რომ უკანონობის მსხვერპლია და სანქცირებული სასამართლოს ინტერესებში არ შედის მისი საქმე გამოიძიონ.

"თავიდან ბოლომდე უკანონობის მსხვერპლი ვარ. ეს ცირკიც აღარ არის, ეს არის ფსკერის ფსკერი და მე ამას ვუყურებ, მათ შორის, თქვენს პროცესებს. ყველა, ვინც მე მასამართლებს, ხელს უწყობს იმას, რომ გამოძიება არ დაიწყოს, ყველა ხართ არალეგიტიმურები, სანქცირებულები და კიდევ მე მაძლევთ შენიშვნას? [...] მოსამართლეებს უსაფუძვლოდ არავინ არ ასანქცირებს," — განაცხადა ნიკა კაციამ სასამართლოზე.

მოსამართლე თამარ მჭედლიშვილმა თავი ვალდებულად არ ჩათვალა "რომელიღაცა" ქვეყნის სანქცირებაზე განმარტება გაეკეთებინა და თვლის, რომ ეს კაციას საქმის სამართლიან გამოძიებას ხელს არ უშლის.

"საერთოდ არ ვარ ვალდებული, [სანქცირებაზე] რამე განმარტება გავაკეთო, მით უმეტეს, რომელიღაცა ქვეყნის პოლიტიკური პირის მიღებულ გადაწყვეტილებაზე სასამართლოში არ საუბრობენ," — განაცხადა მოსამართლე მჭედლიშვილმა.

შეგახსენებთ, მოსამართლე თამარ მჭედლიშვილი 3 მარტს ესტონეთის საგარეო საქმეთა სამინისტროს ვებგვერდზე გამოქვეყნებულ საქართველოს 55 დასანქცირებულ მოქალაქეთა სიაში მოხვდა. ესტონეთის საგარეო საქმეთა მინისტრმა მარკუს ცაჰკმა განაცხადა, რომ ჩამოთვლილი სანქცირებული პირები მონაწილეობდნენ ძალადობაში, ან ემუქრებოდნენ მომიტინგეებს.

შეგახსენებთ, ნიკა კაციას სისხლის სამართლის კოდექსის 260-ე მუხლის მე-6 ნაწილით წარედგინა, რაც დიდი ოდენობით ნარკოტიკული საშუალებების უკანონო შეძენა-შენახვას ითვალისწინებს. კაციას 8-დან 20 წლამდე ან უვადო პატიმრობა ემუქრება. აღსანიშნავია, რომ დაკავებამდე ნიკა კაცია აქტიურად მონაწილეობადა ქვეყანაში მიმდინარე საპროტესტო აქციებში.

ამავე თემაზე:

პროევროპულ აქციებზე დაკავებულთა მოსამართლეები და პროკურორები, აბუ-დაბის ჯგუფური ძალადობის მონაწილე "ოცნების" დეპუტატები — ვინ და რატომ დაასანქცირა ესტონეთმა?

ბრალდებული სრულადაა უზრუნველყოფილი საკვებითა — სპეციალური პენიტენციური სამსახური ნიკა კაციაზე

საია: ვრცელდება ინფორმაცია, რომ ნიკოლოზ კაციას ციხეში საკვებით არ უზრუნველყოფენ, მისი ბარათით კი სხვა მსჯავრდადებულები სარგებლობენ

საკვებზე შეზღუდვის შესახებ გავრცელებული ინფორმაციის შემდეგ, ნიკა კაცია საპატიმროში სახალხო დამცველი აპარატის წარმომადგენელმა მოინახულა

ნარკოდანაშაულის ბრალდებით დაკავებული ჟურნალისტი ნიკუშა კაცია კვლავ პატიმრობაში რჩება