18 მარტს ჰოლივუდის დიდების ხეივანში ისრაელელი მსახიობის, გალ გადოთის, ვარსკვლავი გაიხსნა. ცერემონია ისრაელისა და პალესტინის მხარდასაჭერი მსვლელობების ფონზე გაიმართა.

"სირცხვილი გალ გადოთს", — სკანდირებდნენ პალესტინის მხარდამჭერი აქტივისტები. "გმირები პალესტინელებივით იბრძვიან", "ვივა, ვივა პალესტინა", "No Other Land-მა ოსკარი აიღო", — ეს და სხვა წარწერები კი პროტესტის მონაწილეების ბანერებზე იკითხებოდა. ცნობისთვის, No Other Land ისრაელი-პალესტინის კონფლიქტზე გადაღებული დოკუმენტური ფილმია.

საპროტესტო გამოსვლის გამო, გადოთის ვარსკვლავის გახსნის ცერემონია 15 წუთის დაგვიანებით დაიწყო, თუმცა, მისი მსვლელობისას ასევე ისმოდა დემონსტრანტების შეძახილები. ადგილზე მობილიზებული იყო პოლიციაც, რომელმაც რამდენიმე აქტივისტი დააკავა.

გადოთი, რომლის ამ დროისთვის ბოლო როლი დისნეის ფიფქიას ახალ ეკრანიზაციაში შესრულებული ბოროტი ჯადოქარია, ისრაელის აქტიური მხარდამჭერი გახლავთ. 2023 წლის 7 ოქტომბრის ტერაქტის შემდეგ, მსახიობი სოციალურ ქსელში ხშირად ეხმაურებოდა მიმდინარე კონფლიქტს ახლო აღმოსავლეთში.

"ვერასდროს წარმოვიდგენდი, რომ ამერიკის და მსოფლიოს სხვადასხვა ქალაქის ქუჩებში ვიხილავდით ადამიანებს, რომლებიც არათუ გმობენ ჰამასს, არამედ ზეიმობენ, ამართლებენ და ტაშისკვრით ხდებიან ებრაელების ხოცვას", — განაცხადა გადოთმა ანტისემიტიზმთან მებრძოლი ორგანიზაციის, Anti-Defamation League-ის, ყოველწლიურ სამიტზე.

დიდების ხეივანში ვარსკვლავის გახსნამდე, ისრაელი მსახიობი ჟურნალ Variety-საც ესაუბრა და თავისი პოლიტიკური პოზიციის ახსნას შეეცადა.

"როცა ადამიანები საკუთარი სახლებიდან და საწოლებიდან გაიტაცეს, კაცებმა, ქალებმა, ბავშვებმა, ხანდაზმულებმა, ჰოლოკოსტს გადარჩენილებმა იმ დღის საშინელება გამოიარეს, ვერ გავჩუმდებოდი", — ამბობს გადოთი, — "გაოგნებული ვიყავი ამხელა სიძულვილით, იმით, თუ როგორი დარწმუნებულები არიან ადამიანები, როცა წარმოდგენაც კი არ აქვთ [საკითხზე], ასევე იმითაც, როგორი არასამართლიანია მედია ხშირად. ასე რომ, ხმა უნდა ამომეღო.

"მე პირველ რიგში ადამიანობას ვაყენებ და ჩავთვალე, რომ მძევლებისადმი მხარდაჭერა უნდა გამომეხატა. როცა შენი კომპასი სწორად უჩვენებს მიმართულებას, სინდისიც სუფთა გაქვს. მე ვიცი, რასაც ვუჭერ მხარს და რასაც ვისურვებდი მსოფლიოსთვის".

საპროტესტო მსვლელობები უძღოდა წინ ფიფქიას ხმაურიან საპრემიერო კვირასაც. გადოთთან ერთად, ფილმში რეიჩელ ზეგლერი მონაწილეობს, რომელსაც პალესტინის მიმართ არაერთხელ გამოუხატავს მხარდაჭერა. ინტერნეტში კი ვარაუდობენ, რომ განსხვავებული პოზიციების გამო, გადოთსა და ზეგლერს შორის ურთიერთობა დაიძაბა.

• ფიფქიას პრემიერის პარალელურად, გალ გადოთსა და რეიჩელ ზიგლერს შორის უთანხმოება მწვავდება

გადოთი დისნეის ერთადერთი ვარსკვლავი როდია, რომელიც ისრაელის მხარდაჭერის გამო კრიტიკის ქარცეცხლში გაეხვა. წინა თვეში პალესტინის მხარდამჭერი დემონსტრანტები კაპიტანი ამერიკა: საოცარი ახალი სამყაროს პრემიერაზე შეიკრიბნენ და ფილმში ისრაელელი სუპერგმირის, საბრას, გამოჩენა გააპროტესტეს. მარველის ფილმში ამ პერსონაჟს ისრაელელი მსახიობი შირა ჰაასი ასახიერებს.