უკვე მეოთხე თვეა, რაც თანამდებობის პირების ქონებრივი დეკლარაციები საჯაროდ ხელმისაწვდომი აღარ არის. ამის შესახებ თებერვალში წერდა IDFI (ინფორმაციის თავისუფლებისა და განვითარების ინსტიტუტი) და, ცოტა ხნის წინ, რეპორტაჟი მოამზადა სტუდია მონიტორმაც.

IDFI ანტიკორუფციულ ბიუროსთან, რომელსაც კანონის მიხედვით ევალება თანამდებობის პირთა ქონებრივი დეკლარაციების საჯაროობის უზრუნველყოფა, მიმოწერის ქრონოლოგიასაც აქვეყნებს, რომლის მიხედვითაც დეკემბერში ანტიკორუფციულმა ბიურომ რამდენიმე განსხვავებული პასუხი დააბრუნა შეკითხვაზე: რატომ აღარ არის დეკლარაციები ხელმისაწვდომი საჯაროდ?

თავდაპირველად ანტიკორუფციულმა ბიურომ "ტექნიკური ხარვეზი" მოიშველია, და პირობა გასცა, რომ ეს ხარვეზი მალე აღმოიფხვრება. დეკლარაციების ასლების მოთხოვნის შემდეგ, კი იმავე ბიურომ პასუხად დააბრუნა, რომ დეკლარაციებს ასლებს ვერ გასცემს, ვინაიდან დეკლარაციები საჯაროდაა ხელმისაწვდომი მათსავე ვებ-გვერდზე. თუმცა ცხადზე ცხადია, რომ ეს ასე არ არის. გადასამოწმებლად შეგიძლიათ თავად ეწვიოთ ამ ვებ-გვერდს.

იგივე ურთიერთგამომრიცხავი პასუხები მიიღო სტუდია მონიტორმაც ანტიკორუფციული ბიუროს ხელმძღვანელის, რაჟდენ კუპრაშვილისგან, თითქოსდა დეკლარაციები საჯაროდ ხელმისაწვდომია, უბრალოდ ვებ-გვერდს აქვს ხარვეზი, რის გამოც დეკლარაციები საჯაროდ ხელმისაწვდომი არ არის, თუმცა გამოთხოვის შემთხვევაში, ბიურო დეკლარაციების ასლებს ვერ გასცემს, იმიტომ, რომ ეს დეკლარაციები უკვე საჯაროდ ხელმისაწვდომია ვებ-გვერდზე, თუმცა ტექნიკური ხარვეზის გამო, ხელმისაწვდომი არ არის და ა.შ.

ანტიკორუფციულ ბიუროს ჩვენც მივმართეთ შეკითხვით, რატომ ვეღარ ვხედავთ თანამდებობის პირების ქონებრივ დეკლარაციებს საჯაროდ? პასუხად ტექნიკური ხარვეზიც არ უხსენებიათ, უბრალოდ მოგვწერეს, რომ ქონებრივი დეკლარაციები ამა და ამ კანონის მიხედვით, ნამდვილად ხელმისაწვდომია ყველასთვის. თუმცა, უკვე ბავშვმაც კი იცის, რომ ეს ასე ნამდვილად არ არის. ამის გადასამოწმებლად, კიდევ ერთხელ გთავაზობთ, გადახვიდეთ დეკლარაციების სანახავად ამ ბმულზე.

ანტიკორუფიული ბიუროს პასუხი

ანტიკორუფიული ბიუროს პასუხი

ფოტო: On.ge

აქვე ისიც უნდა აღვნიშნოთ, რომ გასული წლის გაზაფხულზე პარლამენტმა დეკლარაციების გამოქვეყნების გაჯანჯლებას დაუჭირა მხარი, თუ მანამდე თანამდებობის პირების ქონებრივი დეკლარაციები შევსებიდან 48 საათში უნდა გამოქვეყნებულიყო, პარლამენტმა ეს წესი შეცვალა, და ვადა 60 დღემდე გაზარდა. ასევე მიუთითა, რომ იმ პერიოდში, როცა თანამდებობის პირი შევსებულ დეკლარაციაში აღმოჩენილ "ხარვეზს" ასწორებს, დეკლარაცია არ უნდა გამოქვეყნდეს. ასეთი პერიოდი მაქსიმუმ 2 თვეა.

სექტემბრის შემდეგ, ანტიკორუფიული ბიუროს ვებ-გვერდზე აღარ გამოქვეყნებულა არცერთი ახალი დეკლარაცია. დეკემბრის შემდეგ კი ყველა დეკლარაცია დაიხურა.

ქონებრივი დეკლარაციების საჯაროობა უზრუნველყოფს თანამდებობის პირების ფინანსურ გამჭვირვალობას და მოქალაქეებს საშუალებას გვაძლევს, ვაკონტროლოთ საჯარო მოხელეების ქონებრივი და ფინანსური ინტერესები, გამოვავლინოთ ინტერესთა კონფლიქტი და კორუფციული სქემები. უკვე ოთხი თვეა ამის საშუალება არ გვეძლევა, რაჟდენ კუპრაშვილის აზრით კი, არც სავარაუდო დრო ვიცით, როდის მოგვეცემა.

და ისე, რა არის ცუდი გამჭვირვალობაში?