ტვ პირველის ინფორმაციით, პროკურორი, რომლის მიმართვის საფუძველზეც მოსამართლემ 5 საქველმოქმედო ორგანიზაციის დაყადაღების განჩინება გასცა ლაშა კოტრიკაძეა. მოსამართლე, რომელმაც ეს შუამდგომლობა დააკმაყოფილა — მზია გარშაულიშვილია.

ტვ პირველის მიერ მოპოვებულ სასამართლო განჩინებაში საქველმოქმედო ფონდები დანაშაულებრივი ქმედებების ორგანიზებაში არიან დადანაშაულებული, რაც სისხლის სამართლებრივი დევნის დაწყების შემთხვევაში პატიმრობით ისჯება.

აღსანიშნავია, რომ მოსამართლემ სრულად გაიზიარა პროკურორის შუამდგომლობა და დადგენილებასა და დასაბუთებაში წერს, რომ შეინიშნება დანაშაულის შემცველი ნიშნები ამ ფონდების საქმიანობაში.

ჟურნალისტის კითხვაზე — რა არის მთავარი მოტივი, რის გამოც 5 საქველმოქმედო ფონდის ანგარიშების დაყადაღება მოითხოვა საქალაქო სასამართლოსგან, ლაშა კოტრიკაძე პასუხობს, რომ ეს ყველაფერი პროკურატურის მიერ გავრცელებულ განცხადებაში წერია.

"პროკურატურამ რაც გაავრცელა განცხადება, იქ ყველაფერი არ წერია, მაგრამ ჩათვალეთ, რომ ძირითადი დასაბუთება არის ის.

როცა სასამართლოს მივმართე ის შუამდგომლობა გაცილებით მოცულობითია, ვიდრე ის, რაც განცხადებაში წერია და იქ ყველაფერი არის დასაბუთებული. შუამდგომლობა რომ საფუძვლიანი არ ყოფილიყო, რა თქმა უნდა, სასამართლო არ გაიზიარებდა, არ დააკმაყოფილებდა", — პასუხობს ლაშა კოტრიკაძე.

ჟურნალისტის კითხვაზე, შესაძლოა თუ არა ველოდეთ, რომ ამ ფონდებთან ასოცირებული ადამიანების მიმართ დაიწყება სისხლის სამართლის დევნა, ლაშა კოტრიკაძე ამბობს, რომ ჯერ გამოძიება არ დასრულებულა, ამიტომ ამ კითხვაზე პასუხი არ აქვს.

17 მარტს, საქართველოს პროკურატურამ სასამართლოს განჩინების საფუძველზე დააყადაღა: "ნანუკას ფონდის", "ფროსფერითის", "ფონდი ერთმანეთისთვის 24/7-ის", "სირცხვილიას" და "თბილისის ადამიანის უფლებათა სახლის" საბანკო ანგარიშები და მათზე არსებული ფულადი სახსრები დააყადაღა.

როგორც ირკვევა, ვატო შაქარიშვილმა პროკურატურას "პოლიტიკური ველის ჯაშუშებისგან გასაწმენდად" სარჩელით 18 იანვარს მიმართა. საგამოძიებო უწყებამ კი გამოძიება 8 თებერვალს დაიწყო.

საზოგადოებრივი მოძრაობა ერთიანი ნეიტრალური საქართველოს წარმომადგენელმა, ვატო შაქარიშვილმა "ტვ პირველის" ეთერში განაცხადა, რომ "საქმე არის აღძრული უცხო ქვეყნების დაქვემდებარებული ორგანიზაციების მიერ ქვეყანაში გადატრიალების მოწყობის მცდელობაზე და დახმარებაზე".

ჟურნალისტის კითხვაზე, — იცის თუ არა, რას საქმიანობდნენ ეს ფონდები?

ვატო შაქარიშვილის თქმით, ის, რომ ეს ფონდები ეხმარებოდნენ გაჭირვებულ ადამიანებს, ტყუილია.

"ეს ფონდი და სხვა ფონდები ემსახურებიან საქართველოში კონსტიტუციური წყობილების მოშლას, ხელისუფლების დამხობას, რევოლუციურ სცენარებს, გადატრიალებებს, იმ პიროტექნიკის ყიდვას, რომლითაც წვავდნენ პოლიციელებს", — თქვა შაქარიშვილმა.

ამავე თემაზე: