2024 წლის ნოემბრიდან 2025 წლის 18 მარტის ჩათვლით დემონსტრანტებისთვის გზის გადაკეტვისთვის გამოწერილი ჯარიმები 2 მილიონ ლარს აღწევს. ამის შესახებ ინფორმაციას საქართველოს ახალგაზრდა იურისტთა ასოციაციის ავრცელებს.

განცხადებაში ასევე ვკითხულობთ, რომ ქართულმა ოცნებამ ადმინისტრაციულ სამართალდარღვევათა კოდექსის 174¹ მუხლში ცვლილებები შეიტანა, რამაც გზის გადაკეტვის ჯარიმა 10-ჯერ, 500 ლარიდან 5000 ლარამდე გაზარდა.

საია-ს განცხადებით, ამ მუხლით საქმის წარმოებისას პოლიცია სახის ამომცნობ კამერებს იყენებს, რაც ასოციაციის შეფასებით, ერთადერთი მტკიცებულებაა პირის დაჯარიმებისთვის და კონტექსტს არ ითვალისწინებს. საია-მ განცხადებაში ასევე დასძინა, რომ დაჯარიმების პრაქტიკა შეკრებისა და გამოხატვის თავისუფლების უფლების მძიმე დარღვევას წარმოადგენს.

"ქართული ოცნების ხელისუფლებამ ადმინისტრაციულ სამართალდარღვევათა კოდექსის 174¹ მუხლში ცვლილებები შეიტანა, რის შედეგადაც დემონსტრაციების დროს გზის სპონტანურად გადაკეტვისთვის ჯარიმა 10-ჯერ, 500 ლარიდან 5000 ლარამდე გაიზარდა.

ამ მუხლით საქმის წარმოებისას პოლიცია იყენებს სახის ამომცნობ კამერებს. როგორც წესი, ასეთ საქმეებში ერთადერთ მტკიცებულებას სახის ამომცნობი კამერებიდან ამოღებული ფოტოები წარმოადგენს, რომლებიც, ძირითადად, შესაბამისი კონტექსტის იგნორირებით, პირის სამართალდამრღვევად მიჩნევისათვის სასამართლოს საკმარის მტკიცებულებად მიაჩნია.

2024 წლის ნოემბრიდან 2025 წლის 18 მარტის ჩათვლით, აქციის მონაწილეებზე ამ მუხლით გამოწერილი ჯარიმების ოდენობა 2 000 000 ლარს აღწევს.

სპონტანური შეკრებების დროს გზის გადაკეტვისთვის დემონსტრანტების დაჯარიმების პრაქტიკა შეკრებისა და გამოხატვის თავისუფლების უფლების მძიმე დარღვევას წარმოადგენს." — ვკითხულობთ განცხადებაში.

შეგახსენებთ, 14 მარტს ადვოკატი თორნიკე მიგინეიშვილმა ფეისბუქ-პოსტში განაცხადა, რომ შინაგან საქმეთა სამინისტრომ ადმინისტრაციული ჯარიმების საჩივრების განხილვის ვადა 1-დან 3 თვემდე გააგრძელა. განცხადებაში ვკითხულობთ, რომ შსს საჩივრის განხილვას 1-თვიან ვადაში ვერ ასწრებდა და ვადა 3 თვემდე სწორედ ამ მიზეზით გაზარდა. ადვოკატმა ასევე დასძინა, რომ თითოეული განხილვის პროცესი და ჯარიმის გადახდის ვადა 2 თვით გადაიდება.