1988 წელს, ირლანდიის დედაქალაქ დუბლინში მოლი მელოუნის ქანდაკება დაიდგა. ახალგაზრდა ქალი, რომელიც კალათებშემოწყობილ ურიკას მიაგორებს, ირლანდიაში მუშათა კლასის სიმბოლოდ მიიჩნევა. უცნობია, მოლუსკების გამყიდველი მელოუნი ნამდვილად ცხოვრობდა თუ არა, მაგრამ მისი სახელი ქვეყანაში იმდენად ცნობილი გახდა, რომ სიმღერები და ნახატებიც მიეძღვნა, თავად ქანდაკება კი დუბლინის ერთ-ერთ ტურისტულ ღირსშესანიშნაობად იქცა.

თუმცა, როგორც ჩანს, ტურისტები ქანდაკებას შეუფერებლად ექცევიან. 23 წლის ირლანდიელი სტუდენტი ტილი კრიპუელი ცოტა ხნის წინ მოწოდებით გამოვიდა, სკულპტურის დასაცავად ქალაქში ზომები მიიღონ. კრიპუელის თქმით, "ხელების ფათურით" ქალის ქანდაკებას მკერდზე ფერიც კი გადაუვიდა. სტუდენტი ამბობს, რომ "ამაზრზენ ქცევას" თავადაც არაერთხელ შესწრებია ბოლო წლებში, ეს კი "მომავალი თაობისთვის ძალიან ცუდი მაგალითია".

"ამან იმდენად გამაღიზიანა, რომ აუცილებლად უნდა მემოქმედა შესაჩერებლად", — აღნიშნავს კრიპუელი.

სტუდენტის მოწოდებას კი შედეგი ნამდვილად მოჰყვა: დუბლინის საკრებულომ განაცხადა, რომ ქანდაკებას შეაკეთებენ და შემაღლებულ პიედესტალზე დადგამენ, ამასთან, ტურისტულ კომპანიებს მოუწოდებენ, მათ მომხმარებლებს სკულპტურასთან შეხება აუკრძალონ.

კრიპუელის თქმით, ზოგიერთი ტურისტი შეიძლება თავის ქმედებას არასწორად არ თვლიდეს, რადგან "ეს, უბრალოდ, ქანდაკებაა", მაგრამ მოლი მელოუნი ირლანდიურ კულტურაში ქალის რეპრეზენტაციის ერთ-ერთი იშვიათი სახეა. თუმცა, სტუდენტი ამბობს, რომ დუბლინში კაცების ქანდაკებები უფრო მაღალ კვარცხლბეკებზე დგას, მათი სტატუსის ხაზგასასმელად.

ქალაქის დამთვალიერებლების ქცევა კი ერთი ურბანული ლეგენდითაც შეიძლება აიხსნას: ამბობენ, რომ სკულპტურის მკერდზე შეხება ბედ-იღბლის მომტანია. ამ თქმულებას ტურისტული კომპანიებიც იყენებენ; მაგალითად, ერთ-ერთის ვებსაიტზე წერია, რომ "თუკი ქანდაკებას მკერდზე შეეხები და ფოტოს ისე გადაიღებ, ამ ქალაქში აუცილებლად დაბრუნდები".

კრიპუელი კი ამბობს, რომ ეს პრობლემა მხოლოდ ერთ ქანდაკებას ან დუბლინს არ უკავშირდება და მაგალითად მოჰყავს შექსპირისეული ჯულიეტას სკულპტურა ვერონაში.