ხანგრძლივი მოლოდინის შემდეგ, 2025 წლის ევროვიზიაზე საქართველოს წარმომადგენელი 14 მარტს დასახელდა. ევროპის ყველაზე მასშტაბურ მუსიკალურ ფესტივალზე ჩვენს ქვეყანას წელს მარიამ შენგელია წარადგენს სიმღერით Freedom (თავისუფლება).

საქართველოს წარმომადგენელი ევროვიზიაზე წელსაც დამოუკიდებლად, შიდაშესარჩევი კონკურსის გარეშე დაასახელა საზოგადოებრივმა მაუწყებელმა, რომელიც ევროვიზიის ორგანიზატორი ევროპის მაუწყებელთა კავშირის (EBU) წევრია.

საზმაუს ცნობით, წელს ევროვიზიაზე საქართველოს სახელით მონაწილეობის სურვილი 18-მა ქართველმა შემსრულებელმა გამოთქვა და საკუთარი კომპოზიცია წარადგინა. ამასთან, კიდევ 20-ზე მეტმა უცხოელმა კომპოზიტორმა წარუდგინა საქართველოს პირველ არხს საკუთარი ნამუშევარი. თუმცა, საზოგადოებრივი მაუწყებლის თქმით, არჩევანი მათ "ქართული მოტივებით და ეროვნული ელემენტებით დატვირთულ პროექტზე" შეაჩერეს.

"საერთაშორისო კონკურსზე ზუსტად წარმოაჩენს ჩვენი ქვეყნის კულტურულ იდენტობას", — ნათქვამია საზმაუს განცხადებაში.

საკონკურსო კომპოზიციის ავტორი ქეთი გაბისიანია, სიმღერის ტექსტი კი ბუკა კარტოზიას ეკუთვნის.

სიმღერასთან ერთად, 14 მარტს ასევე შედგა მასზე გადაღებული ვიდეოკლიპის პრემიერა. მარიამ შენგელიასთან ერთად, ვიდეოში ანსამბლ ერისიონის მოცეკვავეები და გია ყანჩელის სახელობის თბილისის ახალგაზრდული ორკესტრის წევრები ჩნდებიან.

აღსანიშნავია, რომ ევროვიზიაზე საქართველოს წარდგენის სურვილი წელს გამოთქვა Nini Iris-მაც და პირველ არხს საკუთარი სიმღერა გაუგზავნა. ნინი, რომელიც ამერიკული ვოისის ნახევარფინალისტი იყო, ევროვიზიის ქართველი გულშემატკივრების ერთ-ერთ მთავარ ფავორიტად მოიაზრებოდა.

რაც შეეხება მარიამ შენგელიას, წინათ საქართველოს ვარსკვლავისა და ვოისის მონაწილემ გასულ წელს საზოგადოებას თავი წინასაარჩევნოდ ქართული ოცნების მხარდასაჭერ კონცერტებზე გამოსვლით დაამახსოვრა.

რიგით 69-ე ევროვიზიის სიმღერის კონკურსი შვეიცარიის ქალაქ ბაზელში ჩატარდება. კონკურსის ნახევარფინალური ტურები 13 და 15 მაისს, ფინალი კი 17 მაისს გაიმართება. ევროპის ყველაზე მასშტაბურ მუსიკალურ ფესტივალზე წელს 37 ქვეყანა მიიღებს მონაწილეობას.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...