ქართულ ენაში მეზობლებზე იმდენი რამ თქმულა, ჩვენი ქვეყნის სტუმრებისათვის ნებისმიერი მათგანის წარდგენა შეიძლება მეზობლობის ფენომენის ასახსნელად.

"ამომავალი მზე", "თვალის სინათლე", "მზეზე წინ სანახავი დილა" და სხვა — ეს ის ეპითეტებია, რომლებითაც ქართულ ზეპირსიტყვიერებაში მეზობლები არიან დახასიათებულები. ნამდვილად ყველა მათგანი შეჰფერის ამ ამბის გმირს — ზოია ბებოს.

ზოია ბებო ჟურნალისტი თამარ იაკობაშვილის კარის მეზობელია. სწორედ თამარის დახმარებით გავიგეთ მისი კეთილშობილების შესახებ. 80 წლის ქალს კარგ ამინდში თურმე კარი ყოველთვის ღია აქვს და სამეზობლოს გემრიელი კერძების სურნელით ცდუნებას ცდილობს ხოლმე.

რამდენიმე დღის წინ, როცა თამარის ძმას კორონავირუსი დაუდასტურდა, ორივე მათგანი სახლში აღმოჩნდნენ. ზოია ბებომ ეს ამბავი ალბათ მალევე შეიტყო, რადგან მეზობლებს დაუკაკუნა და თავისი "საფირმო კერძებით" გაწყობილი სინი კართან დაუტოვა. თან, ბოდიშის მოხდენით დაუძენია, "სათანადო ყურადღებას ვერ გაქცევთო".

"ჩვენთვის გაამზადა თავისი საფირმო ღომი და კიდევ ბევრი რამ, დააკაკუნა და კართან დაგვიტოვა"

ფოტო: Tamar Iakobashvili / Facebook

"80 წლისაა, რისკის ჯგუფს წარმოადგენს და მაინც გადაწყვიტა, რაღაცები გაემზადებინა", — წერს თამარი ფეისბუქზე, — "არ არსებობს ჩემთვის ამაზე უკეთესი საჩუქარი".

"მეზობელო კარისაო, სინათლე ხარ თვალისაო"

ფოტო: Youtube

ეს ამბავი პანდემიური სოლიდარობის ერთ-ერთი მაგალითია — თუ როგორ ცდილობენ ადამიანები, კრიზისულ სიტუაციაში სხვებს დაეხმარონ. გასული წლიდან ალბათ გახსოვთ ადამიანი, რომელიც საავადმყოფოში გადაყვანილი მეზობლის ძაღლს ქვედა სართულიდან კვებავდა.

ასევე გასულ წელს, ამერიკელ ფერმერს, რომელმაც ინფარქტი გადაიტანა, მეზობლებმა მოსავალი დაუბინავეს.

თუმცა, ქართულ სამეზობლოში განსაკუთრებული სოლიდარობა, როგორც დასაწყისში აღვნიშნეთ, არც პანდემიამდე იყო უჩვეულო ამბავი. რამდენიმე წლის წინ საგურამოში კაცმა, საკუთარის ნაცვლად, მეზობლის სახლი გაარემონტა.

კოვიდპანდემიის პერიოდში კი, მარნეულში ქალებმა ვირუსით დაინფიცირებული ოჯახის ნაკვეთი გათოხნეს, რათა მათი მოსავალი შეენარჩუნებინათ.