ჩვენ უკვე ვიცით ოსკარის ქანდაკების ისტორია, ახლა დროა გავიგოთ თუ როგორ ამზადებენ ყველა მსახიობისათვის სანატრელ ჯილდოს.

შეგახსენებთ, რომ ოსკარის პირველი ცერემონია 1929 წელს ჰოლივუდ რუზველტ ოტელში ჩატარდა და საღამოს მხოლოდ 250 სტუმარი ესწრებოდა.

1928 წელს ქანდაკების შექმნას ხელმძღვანელობდა იმ დროის ერთ-ერთი ყველაზე პოპულარული არტ - დირექტორი სედრიკ გიბონსი. ხოლო სკულპტორად, ლოს-ანჟელესელი მოქანდაკე ჯორჯ სტენლი.

ოსკარის პირველი ქანდაკება 1928 წელს ჩიკაგოში ჩამოისხა. 1983 წლიდან დღემდე ყოველწლიურად ოსკარის 50 ქანდაკება მზადდება და თითოეული მათგანის დამზადებას სამიდან ოთხ კვირამდე სჭირდება.

ოსკარის 34 სანტიმეტრიანი ქანდაკება დამზადებულია მოოქროვილი ბრიტანიუმისგან, შავი ფერის ლითონის სადგამით. არტ-დეკოს სტილში გამოსახულ რაინდს ხელში ჯვაროსნის ხმალი უკავია და კინოფირის ხუთ კოლოფზე დგას, რაც სიმბოლურად გამოხატავს კინოაკადემიის ხუთ მთავარ მიმართულებას - მსახიობები, მწერლები, რეჟისორები, პროდიუსერები და ტექნიკური პერსონალი.