სომხეთის ნაციონალურმა ასამბლეამ (პარლამენტი) ნიკოლ ფაშინიანის პრემიერად არჩევას მხარი მეორედაც არ დაუჭირა, რაც იმას ნიშნავს, რომ შესრულდა მისი გადადგომით დაწყებული პროცესი და პარლამენტი დაიშალა. ამით შეთანხმებაც სრულდება და რიგგარეშე არჩევნები ჩატარდება.

Armenpress-ის ინფორმაციით, ამჯერად ფაშინიანს ერთმა დეპუტატმა დაუჭირა მხარი, ერთი მოწინააღმდეგე იყო, 76-მა კი თავი შეიკავა. მის ასარჩევად 67 ხმა იყო საჭირო. გამოცემის ინფორმაციით, ეს დამოუკიდებელი სომხეთის ისტორიაში მეორე შემთხვევაა, როცა ეროვნული ასამბლეა დროზე ადრე იშლება.

რამდენიმეთვიანი პროტესტისა და სამხედროების მოთხოვნის შემდეგ, სომხეთის პრემიერმინისტრი, ნიკოლ ფაშინიანი 25 აპრილს გადადგა. ფაშინიანმა განაცხადა, რომ თანამდებობიდან გადადგებოდა და ვადამდელ არჩევნებს დათანხმდებოდა, თუ არ წარადგენდნენ პრემიერმინისტრობის სხვა კანდიდატებს, რაც პარლამენტის დაშლას და რიგგარეშე არჩევნების დანიშვნას გამოიწვევდა. შეთანხმების მიხედვით, სომხეთის პრეზიდენტმა ვადამდელი არჩევნები 20 ივნისს უნდა ჩანიშნოს.

ფაშინიანის გადადგომის მოთხოვნით საპროტესტო ტალღა მას შემდეგ გააქტიურდა, რაც ყარაბაღის ომი საერთო შეთანხმებით დასრულდა და რეგიონზე კონტროლი აზერბაიჯანს გადაეცა. ომის შედეგს სომხური მხარე დამარცხებად აღიქვამდა.