შინაგან საქმეთა სამინისტროს ინფორმაციით, თბილისში არასრულწლოვანთა ტრეფიკინგის ბრალდებით ერთი ადამიანი დააკავეს. უწყების ცნობით, ბრალდებული ბავშვებს მოწყალების თხოვნისა და ნივთების გაყიდვის გზით თანხის შეგროვებას და მისთის გადაცემას აიძულებდა.

"საქმეზე ჩატარებული გამოძიებით დადგინდა, რომ ბრალდებული შრომით ექსპლუატაციას უწევდა მეუღლის არასრულწლოვან დისშვილებს, ფსიქოლოგიური და ფიზიკური ძალადობის გამოყენებით, მოწყალების თხოვნის და წვრილმანი ნივთების გაყიდვის გზით თანხის შეგროვებას და მისთვის გადაცემას აიძულებდა, მისი მოთხოვნების შეუსრულებლობის შემთხვევაში კი მათ ფიზიკურად უსწორდებოდა", — აცხადებენ შსს-ში.

უწყების ცნობით, გამოძიება საქართველოს სისხლის სამართლის კოდექსის 143 პრიმა-ორი მუხლის მე-3 ნაწილის გ ქვეპუნქტით მიმდინარეობს, რაც არასრულწლოვნების მიმართ განხორციელებულ შრომით ექსპლუატაციას გულისხმობს. დანაშაული 14-დან 17 წლამდე ვადით თავისუფლების აღკვეთას ითვალისწინებს.