თითქმის ერთი წლის შემდეგ საქართველოს ელჩი, თეიმურაზ შარაშენიძე უკრაინაში დაბრუნდა. საგარეო საქმეთა სამინისტროში აცხადებენ, რომ ელჩი უკრაინის საგარეო საქმეთა მინისტრს, დმიტრი კულებას და მის მოადგილეს შეხვდა.

როგორც უწყებაში აცხადებენ, შეხვედრებზე უკრაინული მხარე მიესალმა თბილისის გადაწყვეტილებას ელჩის დაბრუნების თაობაზე და პოზიტიურად შეაფასა აღნიშნული ნაბიჯი განსაკუთრებით უკრაინის საზღვრებთან და დროებით ოკუპირებულ ტერიტორიებზე სამხედრო ესკალაციის ფონზე.

2020 წლის მაისში საქართველოს მთავრობამ უკრაინიდან კონსულტაციებისთვის ელჩის, თეიმურაზ შარაშენიძის გამოწვევა მას შემდეგ გადაწყვიტა, რაც პრეზიდენტ ვოლოდიმირ ზელენსკიმ საქართველოს ყოფილი პრეზიდენტი, მიხეილ სააკაშვილის რეფორმების საბჭოს ხელმძღვანელად დანიშნა.