ქართული ოცნების საზოგადოებასთან ურთიერთობის სამსახურის მდივანი, შალვა პაპუაშვილი აცხადებს, რომ კორონავირუსის მესამე ტალღა საქართველოსკენ მოექანება.

"საქართველოში ვრცელდება ტყუილი, თითქოს ეს იყოს რაიმე ქართული გამოგონება კომენდანტის საათი და შეზღუდვა. გადახედონ ევროკავშირის წევრ ქვეყნებს, წამყვან წევრ ქვეყნებს, ყველგან თითქმის მოქმედებს კომენდანტის საათი და შეზღუდვა. ეს მესამე ტალღა ჩვენსკენ მოექანება და ჩვენსეკნაც არ არის გამორიცხული იმ შემთხვევაში, თუ არ იქნება დაცული ყველა შეზღუდვა, ეს მესამე ტალღა მოვიდეს და შემდეგ უკვე ყველა დაიწყებს ვაი ვიშ-ვიშს და ამიტომ ჯობია, რომ აქედანვე სერიოზულად მოიქცეს ყველა, დაემორჩილოს იმ წესებს, რომელიც არის", — განაცხადა პაპუაშვილმა.

კორონავირუსით ინფიცირების მაჩვენებელი თანდათან იზრდება. 6 აპრილის მონაცემებით, საქართველოში კორონავირუსის 897 ახალი შემთხვევა დადასტურდა, გამოჯანმრთელდა 196, ხოლო გარდაიცვალა — 10 ადამიანი.

გაუარესებული ეპიდვითარების გამო შეზღუდვების გამკაცრებაზე ისაუბრა დღეს დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა, ამირან გამყრელიძემაც.

გაიგეთ მეტი: