ჯანდაცვის მინისტრის მოადგილის, თამარ გაბუნიას განცხადებით, ამ ეტაპზე ფართო ლოქდაუნი არ იგეგმება, მაგრამ მისი თქმით, ადგილობრივი წერტილოვანი რეაგირება მნიშვნელოვანია.

"ამ ეტაპზე ნამდვილად არ იგეგმება ფართო ლოქდაუნი, უფრო მეტიც, ყველაფერი კეთდება იმისთვის, რომ სწრაფად მოხდეს ადგილობრივი მატების ლოკალიზება, რადგან გვესმის ყველას, რომ ფართომასშტაბიან შეზღუდვებს ქვეყანა სოციალური და ბიზნეს აქტივობების მიზნებისთვის უკვე ძალიან რთულად გადაიტანს. ამდენად, მნიშვნელოვანია, მცირე, ანუ ადგილობრივი წერტილოვანი რეაგირება ძალიან სწრაფად. ეს არის ის, რაც ახლა ამ მიმდინარე პროცესში კეთდება", — თქვა გაბუნიამ.

დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ 1-ლ აპრილს განაცხადა, რომ თუ ქვეყანაში არსებული კლასტერები გამრავლდება, მაშინ შესაძლოა, სააღდგომოდ სხვადასხვა შემზღუდავი ღონისძიების შემოტანა საჭირო გახდეს.