თბილისში, სამი სხვადასხვა ადგილიდან მოქალაქეები პარლამენტისკენ მიემართებიან, სადაც კომენდანტის საათს გააპროტესტებენ. ვაკის პარკიდან რუსთაველის გამზირისკენ გირჩი — მეტი თავისუფლება მიდის, თსუ-დან სოცაფეთქება და ელენე ხოშტარიას დროა, ხოლო წითელი ბაღიდან სირცხვილია. სამივე მსვლელობა ერთმანეთს ფილარმონიასთან შეხვდება, საიდანაც პარლამენტის მიმდებარე ტერიტორიაზე ერთად გადაინაცვლებენ.

პარლამენტთან მოქალაქეები კომენდანტის საათს ამ რეგულაციის დარღვევით გააპროტესტებენ — ისინი რუსთაველის გამზირზე გათენებას აპირებენ, სადაც მთელი ღამის განმავლობაში იქნება ცოცხალი მუსიკა.

სირცხვილიას აქტივისტები სცენისა და შესაბამისი აპარატურის მონტაჟისთვის პარლამენტთან დილიდან მივიდნენ, თუმცა პოლიციამ მათ ამის საშუალება არ მისცა. მიზეზად სახელდებოდა ის, რომ არ სურდათ, სამანქანო გზა გადაკეტილიყო. საბოლოოდ, აქტივისტები და პოლიცია აპარატურის მონტაჟზე შეთანხმდნენ, სცენის დადგმას კი სირცხვილია რუსთაველის გამზირზე აქციის მონაწილეების შეკრების შემდეგ აპირებს.

საპროტესტო აქცია ცოცხალი მუსიკით დაიწყება და მთელი ღამის განმავლობაში აქციის მონაწილეებისთვის ქართული ბენდები და ელექტრონული მუსიკის არტისტები დაუკრავენ:

  • Killage;
  • Loudspeakers;
  • რეზო და ბავშვები;
  • St. Nudes;
  • წერილი;
  • რობი კუხიანიძე;
  • შოთა ადამაშვილი;
  • რეზო კიკნაძის ბენდი;
  • Skyra;
  • Boya;
  • Trotsky;
  • Frankie Beatnik;
  • Vasil;
  • Tobako Tween;
  • Nio.

ორგანიზატორები ამბობენ, რომ ღამის განმავლობაში, აქცია უზუნველყოფილი იქნება ყველა საჭიროებით: საკვები, სასმელი, გათბობა, ბიოტუალეტები და ა.შ.