სეისმური მონიტორინგის ეროვნული ცენტრის წარმომადგენელი, ლაშა სუხიშვილი ნუცუბიძე-ვაშლიჯვრის დამაკავშირებელ ფერდობზე განვითარებულ მეწყრულ პროცესებზე საუბრისას აცხადებს, რომ ბლოკი, რომელიც დანარჩენ ფერდობს გამოეწყო, არც ისე ნელა მოძრაობს, რომ დამშვიდების საშუალებას გვაძლევდეს.

"ბლოკი, რომელიც ნაპრალით არის გამოყოფილი დანარჩენი ფერდისგან დინამიკაშია, გადაადგილდება და გადაადგილების სიჩქარე არ არის მთლად ისეთი ნელი, რომ დამშვიდების საშუალებას გვაძლევდეს [...]

დღეის მდგომარეობით, ეს [გადაადგილების სიჩქარე] არის 5 სანტიმეტრი ფარდობითი. ფარდობითი ნიშნავს იმას, რომ ბლოკი, დანარჩენ ფერდთან მიმართებაში, გადაადგილდება 5 სანტიმეტრით. ეს მონაცემი გვაძლევს საშუალებას ვივარაუდოთ, რომ პროცესი დაწყებულია, დაახლოებით, 20-30 დღის წინ", — აცხადებს ლაშა სუხიშვილი.

მისი თქმით, მეწყრული პროცესის სიჩქარე უფრო მეტად ზუსტდება და შეიძლება შეიცვალოს. როგორც სუხიშვილი ამბობს, ადგილზე დღესაც მუშაობს გეოდეზიის ჯგუფი და რამდენიმე დღეში ცნობილი იქნება გადაადგილების მიმართულებაც.

• მეწყერი თბილისში — რა სიტუაციაა ადგილზე

ლაშა სუხიშვილის განცხადებით, არსებობს ეჭვი, რომ გადაადგილდება უშუალოდ ის ფერდიც, რომელსაც ბლოკი გამოეყო. მისი თქმით, მიმდინარეობს შესაბამისი სამუშაოები და დაზუსტების შემდეგ გაასაჯაროებენ ინფორმაციას ამ საკითხზეც.

"ეჭვი გვაქვს, და ვფიქრობ, დასაბუთების საშუალება გვექნება, რომ ნაპრალს მიღმა ზონაში მდებარე ფერდიც გადაადგილდება. მიმდებარე, უშუალოდ მისი სამეზობლო ტერიტორიაც, რასაც ნაპრალით გამოეყო ეს ბლოკი", — განაცხადა სუხიშვილმა.

მისი თქმით, თუ ეს ასეა, გამოწვევა იქნება არა მხოლოდ ნაპრალით უკვე გამოყოფილი ბლოკის შეჩერება, არამედ მთელი ფერდის სტაბილიზაციაც. თუმცა, გეოლოგი აღნიშნავს იმასაც, რომ თუ ფერდი გადაადგილდება, ეს ბევრად უფრო ნელი პროცესი იქნება, ვიდრე თავად ბლოკის მოძრაობა.

რაც შეეხება მოსახლეობის ევაკუაციის საჭიროებას, სუხიშვილის თქმით, ჯერ არ არის საკმარისი მონაცემი იმისთვის, რომ ევაკუაციის აუცილებლობაზე, ან მის უარყოფაზე, დაზუსტებით რამის თქმა შეეძლოს.

"იმ შემთხვევაში, თუ ჩავთვლით, რომ მცირე შანსი მაინც არსებობს იმისა, რომ ეს ბლოკი შეეხება მოსახლეობას, მიუხედავად იმისა, რა ხარისხის მონაცემი გვექნება ამის სათქმელად, ჩვენ ამას ვიტყვით", — ამბობს სუხიშვილი.

სუხიშვილი ეხმაურება მეწყრული პროცესების მიმდებარე ტერიტორიაზე, მაჭავარიან-მარშალ გელოვანის დამაკავშირებელი გზის მშენებლობასაც. მისი შეფასებით, არა მხოლოდ ამ გზის, არამედ ნებისმიერ ტიპის ისეთი სამუშაოები უნდა შეწყდეს, რომელიც ვიბრაციის წყარო შეიძლება გახდეს.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.

გაიგეთ მეტი:

• 28 მარტს ვაშლიჯვარში კორპუსების მშენებლობაზე მორატორიუმის გამოცხადების მოთხოვნით აქცია გაიმართება
• სიტუაციას ვაკონტროლებთ, მოსახლეობას პანიკის საფუძველი არ აქვს — კალაძე მეწყრულ ფერდობზე
• კალაძე: მეწყრულ ფერდობთან მონიტორინგის სისტემა დამონტაჟდება, სხვა ზომები კვირის ბოლოს დაკონკრეტდება
• სისტემა დაძრულია და მოძრაობს 5 სმ-ით დღეში, ეს ჩვენთვისაც საკმაოდ დიდი ციფრია — გოდოლაძე მეწყერზე
• ნალექიანი ამინდების შემთხვევაში მაჭავარიანზე სამშენებლო სამუშაოები სრულად გაჩერდება — ბენდელიანი
• კვლევის პირველადი მონაცემები, დაახლოებით, კვირის ბოლოს გვექნება — ბენდელიანი მეწყერზე