ინფექციური საავადმყოფოს დირექტორის, თენგიზ ცერცვაძის განცხადებით, ქვეყანაში ვაქცინის პერმანენტული მიწოდება იქნება და შეიძლება შეიქმნას ვაქცინის სიჭარბე.

"ყველაფერი რომ წასულიყო ისე, როგორც უნდა წასულიყო, ჯერ ყველა ექიმი უნდა აცრილიყო და შემდეგ ასაკობრივი ჯგუფები უნდა დაწყებულიყო, მაგრამ ახლა შეიცვალა სიტუაცია. თუ მსურველები არ გამოჩნდნენ, არ ჩანს იმის ნიშანი და არ არის საზოგადოებაა მზად, რომ რაიმე იძულების ფორმები იყოს გამოყენებული, მხოლოდ ნებაყოფლობითი, მხოლოდ დარწმუნება და პრეცენდენტის შექმნა, რომ ის, ვინც აიცრა, მთლად გმირს ნუ დავარქმევთ, მაგრამ მან ვალი მოიხადა ქვეყნის წინაშე, ვინც არ აიცრა, მან ვალი არ მოიხადა ქვეყნის წინაშე და საზოგადოების წინაშე, რამეთუ საფრთხეს უქმნის თავის თავსაც და საზოგადოებასაც, მაგრამ თუ ჩვენ ეს გარდატეხა ვერ შევიტანეთ მოკლე დროში და ვაქცინის რაღაც დოზები დაგვრჩა გამოუყენებელი... ახლა იქნება უწყვეტი მოდინება ვაქცინის, მადლობა ღმერთს, ის პერიოდი დამთავრდა, როდესაც გვსაყვედურობდნენ, რომ საქართველოს ვაქცინა ვერ შემოგვქონდა. ახლა პირიქით, ვაქცინის სიჭარბე შეიძლება შეიქმნას, რამეთუ პერმანენტული მოწოდება იქნება. უკვე განიხილება საკითხები იმისი, რომ ასაკობრივი ცენზი... თავიდან არ იყო დაგეგმილი, რომ ექიმების პარალელურად 65 წელს ზევით ასაკის მოსახლეობა აცრილიყო, მაგრამ სწორი გადაწყვეტილება იყო, აბა ხომ არ გავაფუჭებთ ვაქცინას?! თუ ამანაც ვერ შეავსო და ვერ გახარჯა ის დოზები, ვაქცინის რაც არის, მაშინ, სავარაუდოდ, კიდევ დაიწევს ქვევით ასაკი ან სულაც გამოცხადდება საყოველთაო ვაქცინაცია", — განაცხადა ცერცვაძემ რუსთავი 2-ის ეთერში.

NDI-ს კვლევის თანახმად, გამოკითხულთა 53 პროცენტი კორონავირუსის წინააღმდეგ ვაქცინის გაკეთებას არ აპირებს. ამასთან, აცრის გაკეთებაზე თანახმაა მხოლოდ 35 პროცენტი, ხოლო 12-მა პროცენტმა არ იცის.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. ჯანდაცვის მინისტრის, ეკატერინე ტიკარაძის განცხადებით, ვაქცინაციის პროცესში 65 წელს ზევით მოქალაქეებიც 25 მარტიდან ჩაერთვებიან.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.