ამ წუთებში სუპერმარკეტ ფრესკოს ვაჟა ფშაველას ფილიალთან ქალთა მზერის ორგანიზებით აქცია იმართება. დემონსტრანტები სუპერმარკეტების ქსელში დასაქმებულთა პირობებს აპროტესტებენ. ისინი ქმედით შრომის ინსპექციასა და მეტ რეგულაციებს მოითხოვენ.

მათ აქციაზე ინფორმაცია გაავრცელეს, რომელსაც უცვლელი სახით გთავაზობთ:

  • ფრესკოს თანამშრომლები სათანადო, კუთვნილ ანაზღაურებას ვერ იღებენ, დაბალი ხელფასებიდან ეჭრებათ თანხები, ჯარიმებისა და დანაკლისების სახით;
  • სამუშაო საათები თითოეული თანამშრომლისთვის აჭარბებს კანონით განსაზღვრულ 40 საათს კვირაში, ხოლო ზეგანაკვეთურად მომუშავე დასაქმებულებს არ უნაზღაურებდნენ ზეგანაკვეთურს გაზრდილი ტარიფით;
  • დასაქმებულებს უწევთ რამდენიმე პოზიციის შეთავსება, რისი საშუალებითაც დამსაქმებელი ზოგავს დამატებითი მუშახელისთვის საჭირო ფულად ანაზღაურებას;
  • მენეჯერები და ადმინისტრატორები თანამშრომლებს უკანონოდ ეპყრობიან და ღირსების შემლახავ, შეურაცხმყოფელ პირობებში აყენებენ;
  • დასაქმებულებს არ აქვთ ჩამოჯდომის და დასვენების უფლება. 24 საათიანი მორიგეობის დროს ერთსაათიან შესვენებაში მათ არ აქვთ თვალის მოხუჭვის და გამოძინების საშუალება;
  • ეს არის თანამედროვე მონობა შრომის კოდექსი დარღვეულია, ჩვენი მშრომელების ღირსება შელახულია!"

რამდენიმე დღის წინ სუპერმარკეტების ქსელი ფრესკოს თანამშრომლების სახელით წერილი გავრცელდა, სადაც თანამშრომლების სამუშაო უფლებების დარღვევაზე იყო საუბარი. ფრესკო შეურაცხმყოფელი განცხადებით გამოეხმაურა თავისი ყოფილი თანამშრომლების სახელით გამოქვეყნებულ წერილს.