ოსკაროსანი ინგლისელი მსახიობი ოლივია კოლმანი თავის გენდერულ იდენტობაზე საჯაროდ პირველად საუბრობს. 52 წლის კინოვარსკვლავი ამბობს, რომ "მოზღვავებული ქალურობის" განცდა არასდროს ჰქონია. კოლმანის უახლესი ფილმია Jimpa, სადაც მის პერსონაჟს არაბინარული გენდერული იდენტობის შვილი ჰყავს. იმის გათვალისწინებით, რომ ოლივიას ფილმოგრაფიაში მრავლად შეხვდებით ქვიარ თემებს, ცოტა ხნის წინანდელ ინტერვიუში მას ჰკითხეს, რატომაა ამბები ლგბტქ ადამიანებზე მისთვის, როგორც მსახიობისთვის, საინტერესო.

"მიხარია, როცა ამ [ლგბტქ] თემში გულთბილად მიღებენ, ეს ჩემთვის დიდი პატივია. აქ უსათუთეს და უმშვენიერეს ამბებს შეხვდებით", — აღნიშნავს კოლმანი, — "მთელი ჩემი ცხოვრება გამუდმებით ვუმტკიცებდი ხალხს, რომ გარკვეულწილად არაბინარულად ვგრძნობდი თავს".

არაბინარული გენდერული იდენტობა არ განეკუთვნება გენდერის ბინარულ გაგებას, ორობით სისტემას (რომლის მიხედვითაც ნებისმიერი ინდივიდი შეიძლება იყოს ან კაცი, ან ქალი).

"ჩემი ქმარი ყოველთვის გეი კაცად მიცნობდა", — აგრძელებს ოლივია, — "მას ეს ესმის, ასე რომ, დაძაბულობას ან უცხოობას არ შევუწუხებივარ. თუმცა, ვფიქრობ, რომ ერთდროულად რამდენიმე ბანაკს ვეკუთვნი და ბევრს ვიცნობ, ვინც ასეა. დიდ დროს არ ვატარებ იმ ადამიანებთან ერთად, ვინც მტკიცედ ჰეტეროსექსუალად წარმოდგება. კაცები, რომლებსაც ვიცნობ და რომლებიც მიყვარს, თავიანთი ბუნების ყველა მხარეს იცნობენ".

საუბარში მსახიობს Jimpa-ის რეჟისორი სოფი ჰაიდიც დაეთანხმა და აღნიშნა, რომ "ქალად აღზრდა და სოციუმში ქალის როლის მორგება არ უნდა იყოს შემზღუდველი", რადგან ეს გაგება "პრობლემურია" და მას "ბევრი ვერ ერგება".

"ამ მხრივ კაცებიც შეზღუდულები არიან, მათ მიმართაც არსებობს მოლოდინები, რომელთა გამართლებაც მოეთხოვებათ", — ამატებს კოლმანი, — "ჩემი და ჩემი ქმრის შემთხვევაში, ვცდილობთ, მორიგეობით მოვირგოთ 'ძლიერის' როლი ან ვიყოთ უფრო მეტად ნაზი. მიმაჩნია, რომ ყოველ ჩვენგანშია ყველა მხარე. ასე მიმაჩნდა ყოველთვის, მაგრამ მხოლოდ ახლაღა, ოდთან [ოდ მეისონ-ჰაიდი, Jimpa-ში მთავარი როლის შემსრულებელი არაბინარული გენდერული იდენტობის მსახიობი] და მათ თემთან საუბრისას აღმოვაჩინე, რომ უჩვეულო არაფერი ყოფილა ამაში".