ერთად ვუგულშემატკივროთ ქართველ ჯუდოკებს. საქართველოს ბანკი ოლიმპიური ნაკრების მთავარი სპონსორია.

7-8 თებერვალს, პარიზის გრანდ სლემი გაიმართება. ტურნირი ძალიან მნიშვნელოვანია, მასში მონაწილეობას მიიღებს საქართველოს ნაკრების 10 ჯუდოკა. ჩვენი წლევანდელი შემადგენლობიდან, ტურნირი მხოლოდ სამივე სინჯის ოლიმპიური მედლის მფლობელს, ლაშა შავდათუაშვილს აქვს მოგებული (2022 და 2023 წლებში).

საქართველოს ნაკრების მთავარი მწვრთნელის, ლაშა გუჯეჯიანისა და მისი შტაბის გადაწყვეტილებით, -60 კგ-ში წარმომადგენელი არ გვეყოლება. ასევე, ტურნირზე ქალი ჯუდოკებიც არ იასპარეზებენ.

საქართველოს ნაკრების შემადგენლობა:

-66 კგ — ვაჟა მარგველაშვილი, თორნიკე გიგაური;

-73 კგ — ლაშა შავდათუაშვილი, გიორგი ჩიხელიძე;

-81 კგ — ზაურ დვალაშვილი, კოტე კაპანაძე;

-90 კგ — ლუკა მაისურაძე;

-100 კგ — ნიკოლოზ ხარაზიშვილი;

+100 კგ — საბა ინანეიშვილი, ირაკლი დემეტრაშვილი.

-66 კგ წონით კატეგორიაში საქართველოს ღირსებას ვაჟა მარგველაშვილი და თორნიკე გიგაური დაიცავენ. ორივე მათგანი ტურნირზე ასპარეზობას პირველი წრიდან დაიწყებს. მარგველაშვილს პარიზის გრანდ სლემზე უკვე 4 მედალი აქვს მოპოვებული (1 ვერცხლი და 3 ბრინჯაო) და პირადი კოლექციის ოქროს მედლით შევსებას შეეცდება. თორნიკე გიგაური კი 19 წლის სპორტსმენია, რომელიც ლიმაში გამართულ მსოფლიო ჩემპიონატზე (ახალგაზრდებს შორის) ოქროს მედლის მფლობელი გახდა.

ტურნირის დაწყებამდე რამდენიმე დღით ადრე, -73 კგ წონით კატეგორიაში ცვლილება მოხდა: გიორგი ტერაშვილი გიორგი ჩიხელიძემ ჩაანაცვლა, რომელიც 2024 წლის პარიზის გრანდ სლემის ფინალისტია. ამავე წონაში ქართული ჯუდოს ლეგენდა, ლაშა შავდათუაშვილიც იჭიდავებს, რომელსაც ტატამზე მეორე წრეში ვიხილავთ.

-81 კგ-ში ჩვენი ნაკრების ღირსებას ზაურ დვალაშვილი და კოტე კაპანაძე დაიცავენ. დვალაშვილი თბილისის გრანდ სლემის (2025) მონაწილეა, სადაც მან მე-3 ადგილი დაიკავა. კოტე კაპანაძე კი ახალგაზრდებს შორის (U23) ევროპის ჩემპიონია, პარიზში გასამართი ტურნირი კი მის კარიერაში მე-2 გრანდ სლემი იქნება: გასული წლის მაისში, მან დუშანბეში იჭიდავა და ბრინჯაოს მედლის მფლობელი გახდა.

საინტერესო იქნება, თუ როგორ იჭიდავებს პარიზის დედაქალაქში 2023 წლის მსოფლიო ჩემპიონი ლუკა მაისურაძე, რომელიც -90 კგ წონით კატეგორიაში იასპარეზებს. ბოლოს იგი ტატამიზე 2025 წლის ნოემბერში, ზაგრების გრანდ სლემზე ვიხილეთ, სადაც ვერცხლის მედალი მოიპოვა.

-100 კგ კატეგორიაში საქართველოს ჩემპიონი, ნიკოლოზ ხარაზიშვილი იასპარეზებს. მძიმე წონაში (+100 კგ) კი საბა ინანეიშვილსა და ირაკლი დემეტრაშვილს ვიხილავთ. ინანეიშვილმა პარიზში გასულ წელსაც იჭიდავა და ბრინჯაოს მედლისთვის ბრძოლაში დამარცხდა, დემეტრაშვილი კი ამ ტურნირზე პირველი მედლის მოპოვებას შეეცდება.

ტურნირის განრიგი

  • 7 თებერვალი | -60, -66 და -73კგ. (დასაწყისის დრო ჯერ უცნობია, ფინალური ბლოკი —20:00);
  • 8 თებერვალი | -81, -90, -100, +100 კგ. (დასაწყისი - 11:00; ფინალური ბლოკი — 20:00).

აქვე შეგახსენებთ, რომ საქართველოს ნაკრებმა 2025 წლის პარიზის გრანდ სლემზე ორი მედალი მოიპოვა — ვერცხლის მედლის მფლობელი ლუკა მაისურაძე გახდა, ხოლო ბრინჯაოს მედალს კი ვაჟა მარგველაშვილმა მოიპოვა.

საქართველოს ბანკი — ოლიმპიური ნაკრების გენერალური სპონსორი.