პროკურატურამ ერთიანობა ნაციონალური მოძრაობის ერთ-ერთ ლიდერს, ნიკა მელიას ახალი ბრალდება წაუყენა. უწყების მიერ გავრცელებულ ინფორმაციაში ნათქვამია, რომ შსს-ს მიერ ჩატარებული გამოძიებით დადგინდა, რომ 2025 წლის 10 ნოემბერს, თბილისის საქალაქო სასამართლოში გამართულ ადმინისტრაციულ სასამართლო სხდომაზე, ნიკა მელიამ სასამართლოს უპატივცემულობა ჩაიდინა, რაც მოსამართლის სიტყვიერი შეურაცხყოფით გამოიხატა.

"ნიკანორ მელიას ბრალდება საქართველოს სისხლის სამართლის კოდექსის 366-ე მუხლის მე-2 ნაწილით (სასამართლოს უპატივცემულობა, რაც გამოიხატა მოსამართლის შეურაცხყოფით) წარედგინა, რაც სასჯელის სახედ და ზომად 2 წლამდე თავისუფლების აღკვეთას ითვალისწინებს.

ვინაიდან, ნიკანორ მელია სხვა სისხლის სამართლის საქმეზე გამოტანილი გამამტყუნებელი განაჩენის საფუძველზე იხდის სასჯელს, პროკურატურა სასამართლოს წინასასამართლო სხდომის განსაზღვრის შუამდგომლობით მიმართავს", — წერია პროკურატურის მიერ გავრცელებულ ინფორმაციაში.

შეგახსენებთ, 26 ნოემბერს, მოსამართლე ირაკლი შვანგირაძისთვის წყლის შესხმისთვის 1 წლითა და 6 თვის ვადით თავისუფლების აღკვეთა მიესაჯა.

მანამდე, ნიკა მელიას ბრალდება სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

მელიას ასევე ადმინისტრაციულ სამართალდარღვევათა კოდექსის 173-ე მუხლს ედავებოდნენ, რაც პოლიციელისთვის სიტყვიერ შეურაცხყოფას გულისხმობს. მოსამართლე თორნიკე ქოჩქიანმა ოპოზიციონერ პოლიტიკოსს 5 000-ლარიანი ჯარიმა დააკისრა.