ევროკომისიის მიერ მომზადებულ დოკუმენტში, რომელიც რუსეთის დასანქცირების მე-20 პაკეტს ემსახურება ყულევის პორტიც მოხვდეს — ინფორმაციას რადიო თავისუფლება ავრცელებს.

"ყულევის პორტი გამოიყენება ნედლი ნავთობის ან ნავთობპროდუქტების საზღვაო ტრანსპორტირებისთვის, რომლებიც წარმოებულია რუსეთში ან ექსპორტირებულია რუსული გემებით, რომლებიც იყენებენ არარეგულარულ და მაღალი რისკის მქონე გადაზიდვის პრაქტიკას," — ვკითხულობთ დოკუმენტში.

კომისიის მიერ მომზადებული სანქციების მე-20 პაკეტი, სხვა ზომებთან ერთად, მოიცავს რუსეთის "ჩრდილოვანი ფლოტის" კიდევ 43 გემის დასანქცირებას, რუსული LNG-ტანკერებისთვის ტექნიკური მომსახურების აკრძალვას და ოთხ საპორტო ტერმინალთან ტრანზაქციების შეზღუდვას.

Reuters-ის ინფორმაციით, 6 ოქტომბერს რუსულმა კომპანია "რუსნეფტმა" ყულევში ახლად აშენებულ ქარხანას ნოვოროსიისკის პორტიდან გამოგზავნილი 105 ათასი ტონა ნავთობი მიაწოდა საზღვაო ტანკერ "კაისერის" (Kayseri) გამოყენებით. ტვირთი ყულევის ნავთობის ტერმინალმა მიიღო, რომელიც ქარხნიდან 5 კილომეტრის დაშორებით მდებარეობს. 22 ოქტომბერს კი აშშ-ის ფინანსთა სამინისტროს უცხოური აქტივების კონტროლის ოფისმა (OFAC) "რუსნეფტი" და "ლუკოილი" დაასანქცირა. დეკემბერში, აშშ-ს შემდეგ რუსული ნავთობკომპანია "რუსნეფტი" დიდმა ბრიტანეთმაც დაასანქცირა.

როგორც TI წერს, 2025 წლის 21 ოქტომბერს, Reuters-მა გამოაქვეყნა სტატია რუსული ნავთობის ყულევში შეტანის შესახებ. ინციდენტმა გააჩინა ეჭვები — ხომ არ არის ყულევის ნავთობგადამამუშავებელი ქარხანა რუსეთზე დაწესებულ სანქციებზე გვერდის ავლის სქემის ნაწილი. ამასთან, მორიგ ჯერზე დაისვა კითხვები, თუ რატომ ხდება საქართველოს მიერ რუსული ნავთობის შეძენა და რუსეთისთვის ფულის გადარიცხვა უკრაინაში მიმდინარე ომის ფონზე.

8 იანვარს, დიდი ბრიტანეთის თემთა პალატის წევრმა, ლეიბორისტული პარტიის წევრმა, ფილ ბრიკელმა ბიძინა ივანიშვილის დასანქცირებაზე ისაუბრა. მან პარლამენტში სიტყვით გამოსვლისას ყულევის ნავთობგადამამუშავებელ ქარხანაზე ისაუბრა, რომელმაც გასული წლის ოქტომბერში რუსული ნავთობის პირველი პარტია მიიღო. ბრიკელის განცხადებით, ოცნებამ აღნიშნულ ქარხანას სახელმწიფო დაფინანსება გაუზარდა, რაც ივანიშვილისთვის დასანქციების მიზეზი შეიძლება იყოს.