"აღიარება და ლეგიტიმაცია არის ის, რაც ხდება, ან არ ხდება, ამას ძალით ვერავის აკეთებინებ. როგორც ჩვენ ვიცით წარსულიდან და ბევრი სხვა მაგალითიდან", — ასე გამოეხმაურა საქართველოს მე-5 პრეზიდენტი სალომე ზურაბიშვილი, "ტვ პირველთან" საუბრისას, "ოცნების" ახალ ინიციატივას, რომლის მიხედვითაც, შესაძლოა, ოცნების ხელისუფლების არაღიარება დასჯადი გახდეს.

3 თებერვალს ოცნების პარლამენტში გრანტების კანონპროექტის განხილვისას ოცნების დეპუტატმა ლევან მაჭავარიანმა დასვა საკითხი — შესაძლებელია თუ არა სამართლებრივი წესით დასჯადი გახდეს კონსტიტუციური ორგანოების არაღიარების საჯარო მოწოდება.

მეორე დღეს, ოცნების პარლამენტის თავმჯდომარემ, შალვა პაპუაშვილმა ჟურნალისტებთან საუბრისას თქვა, რომ ფიქრობენ, თავისი სახელი დაერქვას ექსტრემიზმს, ექსტრემისტულ მიდგომებს და ამის საილუსტრაციოდ გერმანიის მაგალითი მოიყვანა, სადაც, მისი თქმით, "იდენტური ვითარებაა". პაპუაშვილმა განაცხადა, რომ "იქ ადამიანი ამბობდა, რომ იყო გერმანიის მეფე. ჩვენ გვყავს აქ ერთი ქალბატონი, რომელიც ამბობს, რომ არის საქართველოს პრეზიდენტი, პრეზიდენტის შტანდარტი უდგას ხოლმე" და "უნდა ვიფიქროთ, როგორ შეიძლება ექსტრემისტულ გამოვლინებების მოწესრიგება, რომელიც მიმართულია კონსტიტუციური წყობის წინააღმდეგ".

6 თებერვალს შალვა პაპუაშვილი ბრიფინგზე დაადასტურა, რომ "გრანტების შესახებ კანონში ცვლილებების" განხილვისას დაემატება ჩანაწერი კონსტიტუციური ორგანოების არაღიარებაზე სისხლის სამართლებრივი სასჯელის დაკისრების შესახებ. მისი თქმით, კანონპროექტის მეორე მოსმენისას "კონკრეტული ფორმულირება იქნება, რა არის დასჯადი".