ადვოკატ გიორგი კონდახიშვილის ინფორმაციით, კოალიცია ცვლილებისთვის ერთ-ერთ ლიდერს, ნიკა მელიას დამატებით ბრალს წარუდგენენ. ოპოზიციონერ ლიდერს მოსამართლე თორნიკე ქოჩქიანისთვის შეურაცხყოფის მიყენებას ედავებიან.

"დღეს დილით დამიკავშირდა ვაკე-საბურთალოს საგამოძიებო სამსახურიდან გამომძიებელი და მორიგ ჯერზე გვაცნობეს, რომ ნიკა მელიასთან მიმართებით გამოტანილია დადგენილება ბრალდების შესახებ, გასაოცარია, ნიკა მელიას უპირებენ წაუყენონ მორიგი ბრალდება, უკვე სათვალავი აგვერია, საქმე შეეხება კვლავ მოსამართლის შეურაცხყოფის ეპიზოდს, რომელიც თითქოსდა მოხდა რამდენიმე თვის წინ, გაზაფხულზე ჩატარებულ ადამინისტრაციული სამართალდარღვევის საქმეზე, მოსამართლე ქოჩქიანთან მიმართებით, აბსოლუტურად გაუგებარია, ჩვენ ყველანი ვესწრებოდით აღნიშნულ პროცესს, იქ მსგავსი არავითარი ინციდენტი ნიკა მელიას მხრიდან, ყოველშემთხვევაში მე არ დამიფიქსირებია," — განაცხადა ადვოკატმა ტვ პირველის ეთერში.

შეგახსენებთ, 26 ნოემბერს, მოსამართლე ირაკლი შვანგირაძისთვის წყლის შესხმისთვის 1 წლითა და 6 თვის ვადით თავისუფლების აღკვეთა მიესაჯა.

მანამდე, ნიკა მელიას ბრალდება სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

მელიას ასევე ადმინისტრაციულ სამართალდარღვევათა კოდექსის 173-ე მუხლს ედავებოდნენ, რაც პოლიციელისთვის სიტყვიერ შეურაცხყოფას გულისხმობს. მოსამართლე თორნიკე ქოჩქიანმა ოპოზიციონერ პოლიტიკოსს 5 000-ლარიანი ჯარიმა დააკისრა.