ქუთაისში, კლინიკა "უნიქალ მედიში" ექიმმა დირექტორთან შელაპარაკების შემდეგ ცივი იარაღით თვითდაზიანებები მიიყენა. თანამშრომლები კლინიკის დირექტორს, კახა ნურალიძეს ქალებზე ფსიქოლოგიურ ძალადობაში ადანაშაულებენ. ინფორმაციას და კლინიკის თანამშრომლების კომენტარებს "ტვ პირველი" ავრცელებს.

თვითმხილველები ჰყვებიან, რომ დირექტორის მხრიდან ქალი მედპერსონალის შევიწროება სისტემურად ხდებოდა და ნურალიძის გათავისუფლების მოთხოვნით კლინიკის მფლობელებს ხშირად მიმართეს.

"რამდენიმე კვირის წინ დამირეკა თვითონ [ამჟამად დაშავებულმა ქალმა], როგორც დამფუძნებელი ამოდი და რამე ზომები მიიღეთ. ეს კაც [კახა ნურალიძეს] სიცოცხლეს გამომასალმებსო. მე თვითონ იმიტომ არ მოვედი აქ, რომ მეც ანალოგიურ მდგომარეობაში ვყავდი. რამდენიმე თვეა, დამფუძნებლებთან ვცდილობთ, ეს კაცი გაუშვან თანამდებობიდან, თუმცა რეაგირება არ იყო," — განაცხადა თანამშრომელმა "ტვ პირველთან".