8 თებერვალს "ექსპო ჯორჯიაში" (პავილიონი 11), 15:00 საათზე, პარტია თავისუფლების მოედნისა და "საქართველოს საზოგადოებრივი ასამბლეის" ორგანიზებით, გაიმართება საჯარო სამოქალაქო ფორუმი — "ახალი საზოგადოებრივი შეთანხმება საქართველოს გულისთვის".

ფორუმის სპიკერები არიან: ნინო კასრაძე, თოზუ გულმამედლი, ვაჟა გაფრინდაშვილი, დათია ბადალაშვილი, ნინო დობორჯგინიძე, ლევან ღამბაშიძე და ლევან ცუცქირიძე

"რეპრესიები უფრო და უფრო მკაცრ ფორმებს იღებს, თუმცა იძულებითი პოლარიზაციის პოლიტიკა ნელ-ნელა კარგავს გავლენას. პოლიტიკური და სოციალური განსხვავებების მიუხედავად, ქართველები ერთიანდებიან. ეს ღონისძიება სწორედ ამ ცვლილების დასტურია.
საქართველოს მხოლოდ წინააღმდეგობა აღარ ჰყოფნის. საჭიროა სარწმუნო ალტერნატივა, მკაფიო მიმართულება, თუ რა უნდა მოხდეს ცვლილებების შემდეგ და სამოქალაქო შესაძლებლობა, ეს რეალობად იქცეს. ეს ფორუმი ამ პროცესის დასაწყისია და ის არ არის მხოლოდ ერთჯერადი ღონისძიება. ჩვენი ქვეყნის ისტორიის ყველა გადამწყვეტ ეტაპზე საზოგადოება იკრიბებოდა და ერთად მსჯელობდა, თუ როგორი ქვეყნის აშენება სურდა. დღეს საქართველო კვლავ ისტორიულ გზაგასაყარზე დგას და ისევ ისმის მთავარი კითხვა: როგორ საქართველოში გვინდა ცხოვრება?

8 თებერვლის ფორუმი ჩაუყრის საფუძველს ხანგრძლივ სამოქალაქო პროცესს, საერთო
პლატფორმას, რომელიც ღონისძიების ფარგლებს გასცდება და დააკავშირებს ადამიანებს, იდეებსა და ქმედებებს ცვლილებების შესაქმნელად, საზოგადოებრივი ძალის გასაძლიერებლად და იმედის აღსადგენად.

წინასწარ განსაზღვრული პოლიტიკური პროგრამების წარდგენის ნაცვლად, ფორუმი ეფუძნება ღია, მოდერირებულ დისკუსიას შემდეგ საკითხებზე:

● როგორი საქართველოს გულისთვის ღირს ბრძოლა მომდევნო ორი–სამი ათწლეულის
განმავლობაში?

● რა აფერხებდა ამ ხედვის განხორციელებას დამოუკიდებლობის შემდეგ და როგორ შეიძლება
ამ ბარიერების დაძლევა?

● რა როლი უნდა ჰქონდეს საქართველოს საერთაშორისო საზოგადოებაში?

პროგრამა მოიცავს სტრუქტურირებულ გამოსვლებს, პანელურ დისკუსიებს და აუდიტორიის
აქტიურ ჩართულობას. ფორუმში მონაწილეობას მიიღებს შვიდი სპიკერი სხვადასხვა პროფესიული სფეროდან.

ფორუმის თარიღი 8 თებერვალი სიმბოლურ მნიშვნელობას ატარებს საქართველოს ისტორიაში. ეს არის დავით აღმაშენებლის ხსენების დღე და პირველი ქართული უნივერსიტეტის დაარსების თარიღი, ორივე დაკავშირებული სახელმწიფოს განახლებასთან, სამოქალაქო ძალასთან და გრძელვადიან ეროვნულ ხედვასთან.

ფორუმის ფარგლებში დამსწრე სტუმრები, გამომსვლელებთან ერთად იმსჯელებენ საქართველოს მომავალზე: როგორი ქვეყნის აშენება ღირს შემდეგი 20-30 წლის განმავლობაში. ეს არ იქნება ერთჯერადი შეკრება, ფორუმის განმავლობაში ჩამოყალიბებული ხედვების განხორციელება შემდეგი ნაბიჯია.

რეგისტრაციის ბმული: https://forms.gle/FjZGJoLtKP1pT63h8

დასწრების მსურველთათვის კარი ღია იქნება რეგისტრაციის გარეშეც", — წერია ორგანიზატორების მიერ გავრცელებულ ინფორმაციაში.