"ხვალ საღამოს ჩვენ გვეცოდინება ქართულ ოცნებას უნდა მოლაპარაკებები, თუ მოლაპარაკებობანას თამაში. არამარტო ჩვენ, არამედ ევროპულ მხარესაც", — განაცხადა ევროპული საბჭოს წარმომადგენელთან შეხვედრის შემდეგ სტრატეგია აღმაშენებლის ლიდერმა, გიორგი ვაშაძემ. მისი თქმით, "48-საათიანი ბლიცია" გამოცხადებული, რომლის შემდეგაც კვირას საღამოს ან ორშაბათს გამთენიას უფრო ნათელი სურათი იქნება — მიდიან შეთანხმების თუ შეუთანხმებლობის გზით.

მისივე თქმით, მოლაპარაკებები გრძელდება, თუმცა წინასწარ არ შეიქმნის ილუზიებს, რომ ქართული ოცნება საერთო შეხვედრაზე კომპრომისებით მივა.

"ეს არის შუალედური შეხვედრა. დღესაც და ხვალაც გვექნება კიდევ რამდენიმე შეხვედრა. რომ არ გვქონდეს მოლოდინები პირველი შეხვედრიდან, ეს არის პოზიციების მოსინჯვა და არა რაღაცა დეტალური საუბარი — არამარტო იმიტომ, რომ არ უნდა ვისაუბროთ, არამედ არაფერი ახალი არა გვაქვს სათქმელი. ჩვენ დავაფიქსირეთ ჩვენი მკაფიო პოზიცია ექვსივე საკითხთან დაკავშირებით, სადაც გამოვყავით, რომ რა თქმა უნდა, ჩვენთვის პრიორიტეტულია პოლიტიკური პატიმრების და რიგგარეშე არჩევნების საკითხი", — განაცხადა მან.

შეხვედრის დასრულების შემდეგ არც ოპოზიციის და არც მმართველი გუნდის ლიდერები დეტალებზე არ საუბრობენ, რადგან მედიატორებთან შეთანხმება აქვთ დადებული. დღეს დილით ევროპული საბჭოს წარმომადგენლებს მხოლოდ ოპოზიციის წევრები შეხვდენ, თუმცა მოსალოდნელია, რომ გაიმართება მმართველ გუნდთან საერთო შეხვედრაც.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: