ევროპული საქართველოს ერთ-ერთი ლიდერის, დავით ბაქრაძის განცხადებით, ევროპული საბჭოს პრეზიდენტის წარმომადგენელთან შეხვედრები დღეს და სავარაუდოდ, ხვალაც გაიმართება. ბაქრაძემ აღნიშნა, რომ იქნება შეხვედრები, როგორც ცალკე ოპოზიციასთან და მმართველ გუნდათ, ასევე, შესაძლებელია შედგეს ერთობლივი შეხვედრა.

"დიდი ალბათობით მხარეების შეხვედრა შედგება დღეს ან ხვალ. თუმცა მე ვერ გეტყვით კონკრეტულ დროს. დამოკიდებულია, პირველ რიგში, შუამავლებზე. როგორც იცით ახლა დასრულდება ოპოზიციასთან შეხვედრის პირველი რაუნდი. ამის შემდეგ შუამავლებს, სავარაუდოდ, დასჭირდებათ გარკვეული დრო, რომ თავად ჩამოყალიბდნენ საკუთარ წინადადებაში და იმაში, თუ როგორ აგრძელებენ მოლაპარაკებას და უკვე ამის შემდეგ, სავარაუდოდ, დღის მეორე ნახევარშივე განახლდება მოლაპარაკებები. რა ფორმატით იქნება შემდეგი რაუნდი, ამას წინასწარ მე ვერ გეტყვით, მაგრამ ვვარაუდობ, რომ იქნება შეხვედრები ცალკე ოპოზიციასთანაც და დიდი ალბათობით, ოპოზიციისა და ხელისუფლების მონაწილეობით", — განაცხადა მან შეხვედრის შემდეგ.

მანვე აღნიშნა, რომ განიხილეს 6-პუნქტიანი გეგმა, თუმცა შეთანხმების გამო დეტალებზე ვერ ისაუბრებს.

"ამ შეხვედრაზე საუბარი შეეხებოდა პრეზიდენტ მიშელის მიერ შემუშავებულ 6-პუნქტიან ჩარჩო დოკუმენტს. ჩვენ ძალიან დეტალურად ვისაუბრეთ ყველა პუნქტზე ამ დოკუმენტის. დეტალურად გავიარეთ თითოქულ პუნქტზე, თუ რა არის ოპოზიციის ხედვა, რა უნდა გაკეთდეს იქ ჩამოწერილი პრობლემების მოსაგვარებლად და სად შეიძლება იყოს ის კომპრომისის ხაზი, რომელიც ქვეყანას გამოიყვანს შექმნილი ძალიან ღრმა პოლიტიკური კრიზისიდან", — აღნიშნა მან.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი:

• შესაძლო ვადამდელი არჩევნები, რეფორმები — რა წერია მიშელის 6-პუნქტიან გეგმაში