TV პირველის წამყვანმა, ინგა გრიგოლიამ მთავრობას მიმართა და მოუწოდა, რომ არ გაიმეორონ წინა ხელისუფლებების შეცდომები. გრიგოლიამ აღნიშნა, რომ მედიასთან ბრძოლის ბევრი ფორმა უნახავთ, გამოცდილება აქვთ და არ აპირებენ, რომ დანებდნენ.

"ვერ აიღებთ ძალით, გაძლევთ პირობას. გაძლევთ ამ პირობას, ვერასოდეს ვერ დახურავს ვერავინ TV პირველს", — განაცხადა მან.

მან წინა ხელისუფლებების მიერ მედიასთან ბრძოლის მაგალითები გაიხსენა და აღნიშნა, რომ TV პირველისთვის უცხო არ არის მუქარა და შანტაჟი.

"ბევრი წლის განმავლობაში ჩვენ ბევრი რამ გვინახავს. გვინახავს 7 ნოემბერი, ხელკეტებით და სპეცრაზმით აღებული ტელევიზია. გვინახავს შევარდნაძის დროს უშიშროების შესვლა ტელეკომპანია რუსთავი 2-ში, სწორედ ასეთი, ვითომ რაღაც შესაბამისი საბუთებით. გვინახავს ამ ტელევიზიაზე ძალიან დიდი ზეწოლები, შანტაჟი, მუქარა, სასამართლოები, პროკურატურა. გვინახავს არარსებული საქმის გამო ჩვენი დამფუძნებლის მამას, რომ დაატარებდნენ პროკურატურა-პროკურატურა, სასამართლო-სასამართლო და დღემდე, რომ ეს საქმე გრძელდება. [...]

მოკლედ, რისი თქმა მინდა — გავლილი გვაქვს ყველაფერი. ვართ ძალიან გამოწრთობილი თაობა ამ ბრძოლისთვის რომ ვიყოთ მზად და გაძლევთ პირობას, არ დავთმობთ არცერთი წამით ამ ტელევიზიას, რომელიც ამ ხელებით გვვაქვს აშენებული", — განაცხადა მან.

მანვე დაუსვა კითხვა ხელისუფლებას, თუ პროკურატურა ამტკიცებს, რომ ტელევიზიაში შესვლას არ აპირებენ, მაშინ რას ნიშნავს ის ჩანაწერი, რომელიც განჩინებაშია.

"დღეს რაც არ უნდა ენა მოიჩლიქონ ქართული ოცნების წარმომადგენლებმა და საზოგადოებას უთხრან, თუნდაც პროკურატურის 2 სხვადასხვა განმარტებით, რომ უი, არა შეჭრა თურმე არ იგეგმება TV პირველში, მაშ, მე მაქვს კითხვა — რას ნიშნავს ის ჩანაწერი, რომელიც არის გაკეთებული იძულებით შესვლასთან დაკავშირებით? წინააღმდეგობის შემთხვევაში იძულებით პროპორციული ძალის გამოყენბებასთან დაკავშირებით. მაშ, ეს რას ნიშნავს?" — განაცხადა მან.

11 მარტს TV პირველმა მიიღო სასამართლოს განკარგულება, რომლითაც დაკმაყოფილდა პროკურატურის მოთხოვნა ტელეკომპანიიდან ბერა ივანიშვილისა და ირაკლი ღარიბაშვილის საუბრის ჩანაწერების ამოღების შესახებ. განკარგულებაში წერია, რომ თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

• სასამართლომ პროკურატურას TV პირველში იძულების პროპორციული ზომის გამოყენების უფლება მისცა — რას ნიშნავს ეს

ტელეკომპანიის წარმომადგენლებმა და სამოქალაქო საზოგაოდებამ ეს მედიაზე ზეწოლის და წყაროს გაცემის იძულების საფრთხედ შეაფასეს. TV პირველში აღნიშნეს, რომ სასამართლომ პროკურატურას ტელევიზიაში შეჭრის უფლება მისცა. მოგვიანებით პროკურატურაში განაცხადეს, რომ განჩინება ინფორმაციის მატარებელი მოწყობილობის ამოღებაზეა და არა ოფისის ჩხრეკაზე. მათი მტკიცებით, ტელევიზიაში შეჭრას არ აპირებენ.

• გვრჩება აღქმა, რომ მოსამართლის ამ განჩინების მიზანს წარმოადგენდა მედიის ტერორი და დაშინება — მელაძე
• განჩინება სამართალდამცავი და სასამართლო სისტემის პოლიტიკური ინტერესებით გამოყენების ეჭვებს აჩენს — TI
• ჩნდება საფრთხე, მედია კიდევ ერთხელ იქცეს პოლიტიკური ანგარიშსწორების სამიზნედ — მედიაკოალიცია TV პირველზე

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე, სავარაუდოდ, იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იციანიან. ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

პროკურატურამ აღნიშნულ საქმეზე გამოძიება კერძო საუბრის უკანონო მიყურადების, ჩაწერისა და გავრცელების მუხლით დაიწყო.

უწყება არაფერს ამბობს იმაზე, დაინტერესდა თუ არა სავარაუდო ძალადობის ფაქტებით, რაზეც ჩანაწერშია საუბარი.

პროკურატურის ინფორმაციით, საქმეზე მიმდინარე გამოძიების ფარგლებში, ჩატარდება ყველა საჭირო საგამოძიებო და საპროცესო მოქმედება ჩანაწერის მოპოვების და გავრცელების კანონიერების დასადგენად.

სამი დღის შემდეგ, 9 მარტს, ბერა ივანიშვილმა განაცხადა, რომ 2011 წელს მისი ფანების მშობლებმა ბულინგის შესახებ აცნობეს და დაცვის სამსახურმა "ყველა კანონის, მორალის დაცვით მოინახულა" ისინი. ბერა ივანიშვილმა, ასევე, განაცხადა, რომ თუ ვინმე დედას შეაგინებს, აუცილებლად მოსთხოვს პასუხს დღესაც.

გაიგეთ მეტი:

• ტრი-ტრის არ ვიძახი, იქ ირაკლის ვეძახი "ანტონიის" — ბერა ივანიშვილი
• ბერა: დამკვეთებსაც და შემსრულებლებსაც გავაერთიანებ — მათ დედის სიყვარული არ იციან
• არც კი დავიწყებ კამათს, ავთენტური იყო ეს ჩანაწერი, არ იყო, ამას ჩემთვის მნიშვნელობა არ აქვს — ბერა
• როგორ გავამტყუნო ჩემი ძმაკაცი ამიკო, როცა ვიღაც გიჟის ნაწერს კითხულობს ჩემს დედიკოზე და რეაგირებს — ბერა
• რას პასუხობს ბერა ივანიშვილი კითხვას, როდინდელია ჩანაწერები
• ბერას თქმით, 2011-ში მისი ფანების მშობლებმა ბულინგზე აცნობეს და დაცვის სამსახურმა "ყველა კანონის, მორალის დაცვით მოინახულა"
• თუ ვინმე დედას შემაგინებს, ჩემს ოჯახს შეეხება, პასუხს მოვთხოვ დღესაც — ბერა ივანიშვილი